2020 جىلى وڭتۇستىك استانالىقتارعا ارنالعان مەديسينالىق كومەككە بولىنەتىن قارجى ءبىر جارىم ەسە نەمەسە 45،5 ملرد تەڭگەگە ارتادى. بۇل تۋرالى الماتى اكىمدىگىندە وتكەن باسپا ءسوز ءماسليحاتىندا «الەۋمەتتىك مەديسينالىق ساقتاندىرۋ قورى» كەاق الماتى قالالىق فيليالى ديرەكتورى تىلەۋحان ابىلدايەۆ حابارلادى.

«قارجىنىڭ كوبەيۋىنە مىندەتتى الەۋمەتتىك مەديسينالىق ساقتاندىرۋ جۇيەسىنىڭ ەنگىزىلۋى سەبەپ. بيىل قالا بويىنشا تەگىن مەديسينالىق كومەككە بيۋدجەتتەن 116،8 ملرد تەڭگە بولىنگەن بولاتىن. ال، 2020 جىلعا 160،4 ملرد تەڭگە جۇمساۋ جوسپارلانىپ وتىر»، – دەدى ت.ابىلدايەۆ.

ونىڭ ايتۋىنشا، ساقتاندىرۋ جۇيەسىن ەنگىزۋگە دايىندىق باعىتىندا اۋقىمدى جۇمىس اتقارىلعان. نورماتيۆتىك-قۇقىقتىق بازا جاسالىپ، ءۇش دەڭگەيلى مەديسينالىق كومەك جۇيەسى بەكىتىلدى، مىندەتتى مەديسينالىق ساقتاندىرۋدى ەنگىزۋگە قاجەتتى اقپاراتتىق جۇيەلەر ىسكە قوسىلدى.

ءقازىردىڭ وزىندە قور كەلىسىمشارتتار مەن قوسىمشا كەلىسىمدەردى اۆتوماتتى تۇردە جاساۋعا مۇمكىندىك بەرەتىن فۋنكسيونالدى قولدانىسقا ەنگىزدى. بيىلعى تامىز ايىنان باستاپ جەكەلەگەن قۇجاتتارعا ەسق كومەگىمەن قول قويىلىپ جاتىر. ونداعى ماقسات – مەديسينالىق قىزمەتتەردى ساتىپ الۋ جۇمىستارىنىڭ تيىمدىلىگى مەن اشىقتىعىن قامتاماسىز ەتۋ جانە جەمقورلىق فاكتىلەرىنىڭ الدىن الۋ.

سونىمەن قاتار، دايىندىق بارىسىندا ءوزىن-وزى جۇمىسپەن قامتىعان تۇرعىنداردى ساقتاندىرۋ جۇيەسىنە تارتۋ جۇمىستارى دا ءجۇرىپ جاتىر.

«قازىرگى تاڭدا قالادا ستاتۋسى انىقتالماعان 55 مىڭنان استام ازامات تۇرادى. ونىڭ: 12 مىڭى – «جالدامالى جۇمىسكەر»، 15،6 مىڭى – «ءوزىن-وزى جۇمىسپەن قامتىعاندار»، 8،8 مىڭى – «رەسمي تىركەلمەگەن جۇمىسسىزدار». بۇگىنگى كۇنگە دەيىن بارلىعى 5،9 مىڭ ادام ءبىرىڭعاي جيىنتىق تولەم تولەگەن. جىل باسىندا ەنگىزىلگەن جيىنتىق تولەم اتالعان ساناتتاعى ازاماتتاردىڭ بارىنە ءمامس جۇيەسىنە قاتىسىپ، تولىققاندى كومەك الۋعا مۇمكىندىك بەرەدى»، – دەدى الماتى قالاسى الەۋمەتتىك ءال-اۋقات باسقارماسى جەتەكشىسىنىڭ ورىنباسارى دانيار الكەباي ۇلى.

ەستەرىڭىزگە سالا كەتسەك، مىندەتتى الەۋمەتتىك مەديسينالىق ساقتاندىرۋ 2020 جىلدىڭ 1 قاڭتارىنان باستاپ تولىققاندى ىسكە قوسىلادى. باستاپقى ءۇش ايدا ءمامس پاكەتىندەگى قىزمەتتەردى ستاتۋسىنا قاراماستان ەلىمىزدەگى بارلىق ازاماتتار پايدالانا الادى.