الماتى قالاسى اكىمىنىڭ ورىنباسارى ەرجان باباقۇماروۆ پرەزيدەنت ق.توقايەۆقا مەگاپوليس تۇرعىندارىنا كورسەتىلەتىن مەديسينالىق قىزمەتتىڭ ساپاسىن جاقسارتۋدىڭ شارالارى تۋرالى ايتىپ بەردى.

الماتىنى دامىتۋ بويىنشا وتكەن كەڭەيتىلگەن كەڭەستە مەملەكەت باسشىسى قالانىڭ دەنساۋلىق ساقتاۋ سالاسىنىڭ جۇمىسىنا كوپتەگەن شاعىمداردىڭ تۇسەتىنىن اتاپ ءوتتى. ونىڭ مالىمەتى بويىنشا، الەۋمەتتىك ساۋالناما قالالىقتاردىڭ 63%-ىنىڭ مەديسينالىق قىزمەتكە كوڭىلدەرى تولمايتىنىن كورسەتكەن.

دەنساۋلىق ساقتاۋداعى كورپوراتيۆتى باسقارۋدىڭ تومەن دەڭگەيى اتاپ ءوتىلدى. «بۇل اشىقتىقتىڭ بولماۋىنا، جەمقورلىققا اكەلەدى. بۇل كورسەتكىش بويىنشا الماتى 17ء-نىڭ 16-شى ورنىندا تۇر»، –  دەدى پرەزيدەنت، قىسقا مەرزىمدە جاعدايدى تۇزەتۋدى تاپسىردى.

ە. باباقۇماروۆ بايانداعانداي، ب. ساعىنتايەۆتىڭ الماتى اكىمى بولىپ تاعايىندالعان كۇننەن باستاپ جۇمىس قولعا الىندى، ونىڭ تاپسىرماسى بويىنشا قۇرالداردىڭ سانى مەن تەحنيكالىق جاراقتانۋعا قاتىستى قالانىڭ بارلىق مەديسينالىق ۇيىمدارىنا اۋديت جۇرگىزىلدى.

«دەنساۋلىق ساقتاۋ جۇيەسى اكىمدىك جۇمىسىنىڭ باستى باعىتتارىنىڭ ءبىرى بولىپ تابىلادى. بىزگە تۇسكەن 45 مىڭ ءوتىنىشتىڭ مونيتورينگى مەديسينالىق قىزمەت ساپاسىنىڭ تۇرعىنداردى تولعاندىراتىن 10 ساۋالدار توبىنا ەنەتىنىن كورسەتتى»، – دەدى قالا اكىمىنىڭ ورىنباسارى.

جالپى قۇنى 60 ملرد. تەڭگەنى قۇرايتىن قاجەتتى قۇرالدارمەن قالانىڭ مەديسينا ۇيىمدارىن جابدىقتاۋ جونىندەگى ءۇش جىلدىق جوسپار جۇرگىزىلگەن ءاۋديتتىڭ باستى قورىتىندىسى بولدى.

ە. باباقۇماروۆ قالالىقتاردىڭ كورسەتىلگەن قىزمەت ساپاسىنا كوڭىلى تولمايتىندىعىن جاڭا ىقشاماۋداندارداعى ەمحانالاردىڭ جوقتىعىمەن ءتۇسىندىردى، سونىڭ سالدارىنان ورتالىق ەمحانالار شامادان تىس تولىپ، كەزەكتەر ورىن الىپ، دارىگەرلەرگە نورماتيۆتەن تىس جۇكتەمە تۇسكەن.

«بۇل پروبلەمانى شەشۋ ءۇشىن ءبىز دارىگەرلىك امبۋلاتوريالار جۇيەسىن دامىتۋدىڭ ءۇش جىلدىق جوسپارىن ازىرلەدىك. بىزگە بارلىعى 35 امبۋلاتوريا قاجەت، ولاردىڭ 7ء-ى ءقازىردىڭ وزىندە اشىلدى، جىل اياعىنا دەيىن تاعى 3ء-ىن اشامىز»، – دەدى قالا اكىمىنىڭ ورىنباسارى. بۇدان وزگە، ونىڭ مالىمەتى بويىنشا بيىلعى جىلى 3 ەمحانا، ال كەلەر جىلى تاعى 3 ەمحانا سالىنادى.

مەدمەكەمەلەردى كورپوراتيۆتى باسقارۋدىڭ تيىمدىلىگىن ارتتىرۋ ماقساتىندا قاداعالاۋ كەڭەستەرى قۇرىلعان بولاتىن. الايدا ولاردىڭ قۇرامىندا ەمحانالار مەن اۋرۋحانالاردىڭ ءبىرىنشى باسشىلارى بولعاندىقتان مەديسينالىق ۇيىمداردىڭ جۇمىس ساپاسىنا وڭ ىقپال ەتە المادى.

«وسىعان وراي كونكۋرستىق نەگىزدە 45 جاڭا قاداعالاۋ كەڭەستەرى قۇرىلدى، بۇل بارلىق ۇيىمداردىڭ 60%-ىن قۇرايدى. قالعاندارى بويىنشا جۇمىس جالعاسۋدا»، – دەپ ءتۇسىندىردى ە. باباقۇماروۆ.

سونىمەن قاتار قالادا جەكەشەلەندىرۋ مەن ءمجا دامىتۋدىڭ كەشەندى جوسپارى ازىرلەنۋدە. جالپى ءادىس انىقتالدى – كاسىبي ەمەس اكتيۆتەردى وپەراسيالىق باسقارۋدان ارىلىپ، جاعدايدى باقىلاۋدى ساقتاپ قالۋ قاجەت. قالا بىرەگەي مەديسينالىق مەكەمەلەردى، شەتتەگى ەمحانالاردى جانە ءىرى اۋرۋحانالاردى باسقارۋ قۇقىعىن وزىنە قالدىرادى.

بۇلاردان وزگە، ينۆەستورلارمەن جۇمىس جانداناتىن بولادى، قىزمەتتىڭ اشىقتىعى جانە سىبايلاس جەمقورلىققا قارسى كۇرەس قامتاماسىز ەتىلەدى. بۇل رەتتە سىبايلاس جەمقورلىققا قارسى قىزمەتىمەن بىرگە جوبالى ءوفيستىڭ جۇمىسى باستالدى.

الماتى اكىمىنىڭ ورىنباسارى مەملەكەت باسشىسىن دەنساۋلىق ساقتاۋ سالاسىنىڭ جۇمىسى جاڭا سەرپىن الاتىنىنا، ايتىلعان پروبلەمالاردىڭ شەشىلەتىنىنە سەندىردى. ونىڭ ۇستىنە، پرەزيدەنتتىڭ تاپسىرماسىنا سايكەس ءوسىمنىڭ جاڭا رەزەرۆتەرىن انىقتاۋ ماقساتىندا ءبىلىم جانە دەنساۋلىق ساقتاۋ جۇيەلەرى بازاسىندا الەۋمەتتىك ەكونوميكا داميتىن بولادى.

«مۇندا قىزمەت كورسەتۋدىڭ جەكە سەكتورىن قۇرۋ ماقساتىندا ءمجا تەتىكتەرى قولدانىلادى. ول ءۇشىن بيۋدجەت ەسەبىنەن سالىنعان ۇيلەردىڭ ءبىرىنشى قاباتتارى الەۋمەتتىك ماڭىزى بار نىساندارعا بەرىلەتىن بولادى»، – دەپ قورىتىندىلادى ءسوزىن ە. باباقۇماروۆ.