اقپارات جانە قوعامدىق دامۋ ءمينيسترى داۋرەن ابايەۆ قازاقستاندىقتاردى تەلەفون نومىرلەرىن تىركەۋگە شاقىردى دەپ حابارلايدى Qamshy.kz اقپارات اگەنتتىگى.

بۇل تۋرالى مينيستر "حابار" ارناسىنداعى "وتكرىتىي ديالوگ" باعدارلاماسىندا ايتىپ بەردى. 

«ەلىمىزدە ۇيالى بايلانىس ابونەنتتەرىنە ءوز ءنومىرىن تىركەۋدى مىندەتتەيتىن زاڭ بار. ءقازىر سول زاڭنىڭ قالاي ورىندالاتىنىن كورىپ وتىرمىز. اقپارات جانە كوممۋنيكاسيالار مينيسترلىگىن باسقارعان كەزىمدە وسى ماسەلەنى بىرنەشە رەت ءتۇسىندىردىم. ءقازىر بۇل سالاداعى مەملەكەتتىك ساياساتتى سيفرلىق دامۋ مينيسترلىگى جۇرگىزەدى. ءبىراق مەنىڭ بۇل ماسەلە تۋرالى پىكىرىم وزگەرگەن جوق. مەملەكەت مينيسترلىك ارقىلى ابونەنتتەردىڭ ءوزى ءۇشىن ءبارىن رەتكە كەلتىرىپ جاتىر" - دەدى مينيستر.

"تەلەفون ءنومىرى ەڭ الدىمەن تەك بىرنەشە سان عانا ەمەس، سونداي-اق جەكەمەنشىكتى زات. ول - مەملەكەتتىك قىزمەتتەرگە، كاسسالىق وپەراسيالار مەن تولەمدەرگە قول جەتكىزۋ دەگەن ءسوز. سونىمەن قاتار، جەكە قاۋىپسىزدىك ماسەلەسى تاعى بار. ءنومىرىڭىز باسقا ادامعا تىركەلگەنىن ەلەستەتىپ كورىڭىزشى. ول ادام ءسىزدىڭ جەكە مالىمەتتەرىڭىزگە قول جەتكىزۋ ارقىلى ءنومىرىڭىزدى وشىرە الادى، بالانستان قاراجاتتى الادى جانە قوڭىراۋ مالىمەتتەرىنە قول جەتكىزە الادى. 

مەملەكەت ەشقانداي شارا قولدانبادى دەپ ايىپ تاعۋدىڭ ورنىنا،  15 مينۋت ۋاقىتڭىزدى ءبولىپ، تەلەفون ءنومىرىڭىزدى تىركەپ الىڭىز. قانشا ەسكەرتىپ ايتساق تا، كوپتەگەن ابونەنتتەر بايلانىسسىز قالعاندا عانا قوزعالدى. العاشىندا نارازىلىق كوپ بولدى، ءبىراق ادامدار ءوز اتىنا قانشا ءنومىردىڭ تىركەلگەنىن كورىپ، مەملەكەتتىڭ دۇرىس جۇمىس ىستەپ وتىرعانىن ءتۇسىندى. سەبەبى، ۇيالى ءنومىر – مەملەكەتتىك قىزمەتتەرگە، اقشا ترانزاكسياسىنا، تولەمدەرگە رۇقسات بەرەتىن ادامنىڭ جەكە مەنشىگى.

ەگەر تۇرعىننىڭ اتىنا ءوز رۇقساتىنسىز ءنومىر تىركەلسە، بۇل ءنومىر قولدانۋشىسى الاياق نەمەسە تەلەفون لاڭكەسى بولىپ شىقسا، تاعى ءبىراز قيىندىق تۋىنداۋى عاجاپ ەمەس. ونداي جاعدايدا قۇقىق قورعاۋ ورگاندارىنا بارىپ، زاڭعا قايشى ەشتەڭە ىستەمەگەنىن دالەلدەۋ قاجەت»، - دەپ ءتۇسىندىردى د. ابايەۆ.

ەسكە سالا كەتەيىك، 2019 جىلدىڭ 1 قاڭتارىندا قازاقستاندا ابونەنتتىك قۇرىلعىلاردى تىركەۋ پروسەسى اياقتالعان بولاتىن. بۇل ءموبيلدى تەلەفونداردىڭ ۇرلانۋىنا، الاياقتىققا قارسى كۇرەس ماقساتىندا ىستەلىپ وتىر.