قازاقستان پرەزيدەنتى قاسىم-جومارت توقايەۆ ءوزىنىڭ كۇيەۋ بالاسى تەمىرتاي ءىزباستيندى قازاقستاننىڭ بولگارياداعى ەلشىسى ەتىپ تاعايىندادى. بۇل تۋرالى اقوردا سايتى حابارلادى.
"مەملەكەت باسشىسىنىڭ جارلىعىمەن تەمىرتاي رىمتاي ۇلى ءىزباستين قازاقستاننىڭ بولگارياداعى توتەنشە جانە وكىلەتتى ەلشىسى قىزمەتىنە تاعايىندالدى" دەلىنگەن اقوردانىڭ حابارلاماسىندا.
ازاتتىق راديوسىنىڭ جازۋىنشا، تەمىرتاي ءىزباستين - قاسىم-جومارت توقايەۆتىڭ قارىنداسى قارلىعا ءىزباستينانىڭ كۇيەۋى. ول 2009 جىلى قازاقستاننىڭ بولگارياداعى ديپلوماتيالىق وكىلدىگىنىڭ جەتەكشىسى بولىپ تاعايىندالعان. ديپلوماتيا سالاسىندا 1994 جىلدان بەرى قىزمەت اتقارىپ كەلەدى. 2013 جىلى Kapital.kz سايتى توقايەۆتىڭ ۇلى تيمۋر جانە ءىزباستيننىڭ ۇلى مۇحامەد اتىراۋ وبلىسىندا شيكىزات يگەرۋمەن اينالىساتىن "ابي پەترولەۋم كەپيتال" مۇناي كومپانياسىنىڭ قۇرىلتايشىلارى ەكەنىن جازعان.
پرەزيدەنت توقايەۆ قازاقستاننىڭ تاعى دا باسقا ەلدەردەگى ەلشىلەرىن دە اۋىستىردى.
اقوردانىڭ حابارلاۋىنشا، شاحرات نۇرىشيەۆتىڭ ورنىنا قازاقستاننىڭ قىتايداعى ەلشىسى بولىپ عابيت قويشىبايەۆ تاعايىندالعان. 47 جاستاعى قويشىبايەۆ بۇعان دەيىن پرەزيدەنت اكىمشىلىگىنىڭ سىرتقى ساياسات جانە حالىقارالىق بايلانىس ءبولىمى جەتەكشىسىنىڭ ورىنباسارى بولعان.
توقايەۆتىڭ جارلىعىمەن قازاقستاننىڭ لاتۆياداعى ەلشىسى بولىپ تيمۋر پىرىمبەتوۆ تاعايىندالدى.
پىكىر قالدىرۋ