اتاۋلى الەۋمەتتىك كومەككە يە بولۋ ماقساتىندا قازاقستاندا 74 مىڭ وتباسى ءوز كىرىستەرىن جاسىرعان. بۇل تۋرالى ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ءمالىم ەتتى – دەپ Qamshy.kz اقپارات اگەنتتىگى حابارلايدى، ەلوردا ينفو-عا سىلتەمە جاساپ.

"بيىلعى ءساۋىر ايىنان باستاپ اتاۋلى الەۋمەتتىك كومەكتى تولەۋ جۇيەسى وزگەردى، كولەمىمەن قاتار الۋشىلاردىڭ دا سانى ارتتى. بىزدە بارلىعىن اقپاراتتىق جۇيە اۆتوماتتى تۇردە انىقتايدى. ياعني ااك الۋشى تەك قانا ءوتىنىش جازادى، قالعانىن اقپاراتتىق جۇيە ءوزى انىقتايدى. ءبىز جۇيە ارقىلى ءوز كىرىستەرىن جاسىرعان 74 مىڭ وتباسىنى انىقتادىق"، – دەيدى ءبىرجان نۇرىمبەتوۆ ۇكىمەت وتىرىسىندا.

ءمينيستردىڭ مالىمدەۋىنشە، ولاردىڭ قاتارىندا جاقسى ۇيلەرى مەن اۆتوكولىكتەرى بار ااك الۋشىلار دا بولعان.

"سەبەبى ولاردا راسىمەن دە رەسمي تۇردە كىرىس جوق. بۇل دۇرىس ەمەس، ءسىز 2 قاباتتى كوتتەدجىڭىز بولىپ تۇرىپ ااك الاسىز، ال ناعىز كومەككە مۇقتاج وتباسى جاردەماقىسىز قالۋدا. وسىعان وراي ءبىز ۋچاسكەلىك كوميسسيانىڭ جۇمىسىن كۇشەيتەتىن بولامىز. ولار بارلىعىن تەكسەرىپ، ءسىز ااك-تى الا المايسىز دەپ ايتۋى ءتيىس. ءبىز ۋچاسكەلىك كوميسسيا جۇمىسىن بارلىعىن تەكسەرىپ ۇلگەرە الاتىنداي ەتىپ زاڭداستىراتىن بولامىز. ااك وتباسىلىق تابىسى جوق، كومەككە مۇقتاج جاندارعا تولەنۋى ءتيىس. بۇل جاردەماقى ەلىمىزدە 2002 جىلدان باستاپ تولەنىپ كەلەدى. قازىرگى تاڭدا ااك بويىنشا جاڭا زاڭ جوباسى ءماجىلىستىڭ قاراۋىنا ۇسىنىلدى. كەلەسى جىلدان باستاپ ااك تولەۋ جۇيەسى وزگەرتىلەدى"، –دەدى مينيستر.