قازاقستاندىقتاردىڭ اقشا اۋدارىمدارىن تەكسەرۋ ماسەلەسى الىدە قىزۋ تالقىلانىپ جاتىر. بۇل تۋرالى ۇلتتىق بانك ءتوراعاسى ەربولات دوسايەۆ مالىمدەدى، – دەپ Qamshy.kz اقپارات اگەنتتىگى حابارلايدى.
"قارجى مينيسترلىگى Kaspi bank ارقىلى جاسالاتىن اقشا اۋدارىمدارىنا سالىق سالادى دەپ ويلامايمىن. تەك وسى تولەمدەردەن سالىق تولەنىپ-تولەنبەگەنىن كورىپ وتىرعىسى كەلەدى. بۇل ماسەلەنى ۇلتتىق بانك پەن قارجى مينيسترلىگى بىرلەسىپ قاراپ جاتىر. قولما-قول اقشاسىز تولەم جاساۋ كولەمى ۇلعايسا، بيۋدجەتكە تۇسەتىن كىرىس تە ارتۋى كەرەك دەپ ويلايمىن. بۇل قالىپتى نارسە، سەبەبى اقشا كولەڭكەلى ەكونوميكادان شىعادى"، – دەپ جۋرناليستەرگە سۇحبات بەرۋ بارىسىندا جاۋاپ بەردى.
سونداي-اق بۇل ماسەلە تەك Kaspi بانككە عانا ەمەس، بۇكىل بانك سەكتورىنا قاتىستى ەكەنىن ايتتى.
"كولەڭكەلى ەكونوميكانىڭ ۇلەسىن ازايتۋ باعىتىنداعى بىرلەسكەن جۇمىس قوسىمشا تابىس الۋ تۇرىندەگى وڭ ناتيجەلەرمەن جالعاسقانىن قالايمىز. بۇل ازىرگە قارجى مينيسترلىگىنىڭ ۇسىنىسى عانا، بانك قاۋىمداستىعىمەن تالقىلانىپ جاتىر"، – دەدى دوسايەۆ.
ەسكە سالساق، قارجى مينيسترلىگى سالىقتان جالتارعان كاسىپكەرلەردى انىقتاۋ ءۇشىن اقشالاي اۋدارىمدار تەكسەرىلەتىنىن مالىمدەگەن ەدى.
قارجى ۆيسە-مينيسترى رۋسلان ەڭسەبايەۆتىڭ ايتۋىنشا، قازىرگى ۋاقىتتا Kaspi Gold تولەم جاساۋدىڭ ەڭ ءجيى قولدانىلاتىن ءتۇرى. الايدا تولەم جۇيەسى سالىق زاڭناماسىنىڭ تالابىنا ساي ەمەس.
ودان وزگە ۆەدومستۆو باسىندا Kaspi.kz ارقىلى اۋدارىم جاساۋعا تىيىم سالۋدى ويلاپتى. ءبىراق، بۇل ەل ەكونوميكاسىنا كەرى اسەرىن تيگىزۋى مۇمكىن دەگەن پايىمعا كەلگەن.
پىكىر قالدىرۋ