الماتىدا Nur Otan پارتياسى جانىنداعى بالالاردىڭ قۇقىقتارىن قورعاۋ جونىندەگى رەسپۋبليكالىق كەڭەستىڭ جۇمىس توبى مۇشەلەرىنىڭ قالا اكىمدىگىنىڭ قۇرىلىمدىق باسقارمالارىمەن كەڭەسى ءوتتى، دەپ جازادى اكىمدىكتىڭ رەسمي سايتى.

ءىس-شاراعا الماتى قالاسى اكىمىنىڭ ورىنباسارى ەرجان باباقۇماروۆ، Nur Otan پارتياسى جانىنداعى بالالاردىڭ قۇقىقتارىن قورعاۋ جونىندەگى رەسپۋبليكالىق كەڭەس ءتوراعاسىنىڭ ورىنباسارى دينارا زاكييەۆا قاتىستى.

12 قاراشادان باستاپ «باقىتتى وتباسى» پارتيالىق جوباسىن ىسكە اسىرۋ شەڭبەرىندە Nur Otan پارتياسى جانىنداعى بالالاردىڭ قۇقىقتارىن قورعاۋ جونىندەگى رەسپۋبليكالىق كەڭەستىڭ ساراپتامالىق توبى بالالاردىڭ قۇقىقتارى مەن زاڭدى مۇددەلەرىن قورعاۋدى قامتاماسىز ەتۋ جۇيەسىن جەتىلدىرۋ ۇسىنىستارىن زەردەلەۋ جانە جيناۋ ماسەلەلەرى بويىنشا الماتى قالاسىندا ءوز جۇمىسىن باستايدى. باعدارلاما بويىنشا قالاداعى بارلىق سەگىز اۋدانعا بارۋ جوسپارلانعان.

مۇنداعى باستى ماقسات – «باقىتتى وتباسى» جوباسىمەن تانىسۋ، بالالاردىڭ قۇقىقتارىن قورعاۋدى قامتاماسىز ەتۋ جانە قيىن ومىرلىك جاعدايداعى وتباسىلارعا كومەك كورسەتۋ قۇرالدارىن ەنگىزۋ، ايماقتىق دەڭگەيدە بالانىڭ قۇقىقتارى مەن بوستاندىقتارىن قامتاماسىز ەتەتىن ۆەدومستۆولاردىڭ قىزمەتىن باعالاۋ.

كەڭەستە قوعامدىق دەنساۋلىق باسقارماسى باسشىسىنىڭ مىندەتىن اتقارۋشى جانار مادەيەۆا، ءبىلىم باسقارماسىنىڭ باسشىسى گۇلنار حودجابەرگەنوۆا، الەۋمەتتىك ءال-اۋقات باسقارماسىنىڭ باسشىسى راحات شيماشيەۆانىڭ، الماتى قالاسى جەرگىلىكتى پوليسيا قىزمەتىنىڭ باسشىسى تورەحان ءيسيننىڭ بايانداماسى جانە قالادا بالالاردى قولداۋ بويىنشا ىسكە اسىرىلىپ جاتقان جوبالار تۋرالى ەسەپتەر تىڭدالدى.

Nur Otan پارتياسى جانىنداعى بالالاردىڭ قۇقىقتارىن قورعاۋ جونىندەگى رەسپۋبليكالىق كەڭەستىڭ جۇمىس توبى قالادا 19 قاراشاعا دەيىن جۇمىس ىستەيتىن بولادى.

الماتىداعى توپ ساراپشىلارىنىڭ باستى نازارىندا ورتا جالپى ءبىلىم بەرەتىن مەكتەپتەر، جەكەمەنشىك بالاباقشالار، كامەلەتكە تولماعاندار اراسىنداعى قىلمىستىڭ الدىن الۋ جۇمىسى ۇيىمدارى بولماق.

سونىمەن قاتار، ساراپشىلار مامانداندىرىلعان ينتەرناتتاردىڭ، بالالار ءۇيىنىڭ، كامەلەتكە تولماعانداردى بەيىمدەۋ ورتالىعىنىڭ، مامانداندىرىلعان مەكتەپتەردىڭ، وقۋشىلار سارايىنىڭ جۇمىسىمەن تانىسادى.