الماتى قالاسى اكىمىنىڭ ورىنباسارى ەرجان باباقۇماروۆ شاھاردىڭ ساراپشىلىق قاۋىمداستىعى جانە قوعامدىق كەڭەستىڭ كەڭەيتىلگەن قۇرامداعى مۇشەلەرىمەن كەزدەسىپ، «الماتى-2050» ستراتەگياسىنىڭ جوباسىن تالقىلادى، دەپ حابارلايدى اكىمدىكتىڭ باسپا ءسوز قىزمەتى.

القالى جيىن قالانىڭ دامۋىنا قاتىستى قۇجاتتىق جوبالاردىڭ جۇرتشىلىق جانە ساراپشىلارمەن تالقىلاۋدى قۇپ كورەتىن قالا اكىمى باقىتجان ساعىنتايەۆتىڭ تاپسىرماسىنا سايكەس ءوتتى.

– بۇل قالا دامۋىنىڭ باستى باسىمدىقتارىن قامتيتىن نەگىزگى قۇجات. ۇزاق مەرزىمدى ماقساتتاردى انىقتاۋدا سىزدەردىڭ پىكىرلەرىڭىز ءبىز ءۇشىن وتە ماڭىزدى. ءبارىمىز بىرىكسەك، قالا ءۇشىن قاجەت ۇزاق مەرزىمدى ءارى وڭتايلى شەشىمدەر تابارىمىز ءسوزسىز، – دەپ اتاپ ءوتتى ەرجان باباقۇماروۆ.

جيىندا قالانىڭ قوعامدىق كەڭەسىنىڭ ساراپشىلارى مەن وكىلدەرى جاھاندىق جانە وڭىرلىك باسەكەلەستىك، ينفراقۇرىلىم مەن كولىك، قوعامدىق قاۋىپسىزدىك، دەنساۋلىق ساقتاۋ مەن ەكولوگيا، ادامي كاپيتالدى دامىتۋ سياقتى ستراتەگيالىق دامۋ باعىتتارى بويىنشا پىكىر الماستى.

ءوز ۇسىنىستارىن ساياساتتانۋشى، جبۇك مۇشەسى ايدوس سارىم، Kazakhstan Growth Forum ۇيىمداستىرۋ كوميتەتىنىڭ ءتوراعاسى ەلدار ءابدىرازاقوۆ، قارجىگەر جانە كاسىبي ەنەرگەتيك اسەت ناۋرىزبايەۆ، قوعام بەلسەندىسى ەرلان نۇرپەيىسوۆ، مونيتورينگ جونىندەگى مامان مارجان ايتجانوۆا، حالىقتى قونىستاندىرۋ سالاسىنداعى ساراپشى ايدا ءالجانوۆا، كولىك ينفراقۇرىلىمىن دامىتۋ سالاسىنداعى ساراپشى ەلەنا ەرزاكوۆيچ، ەكولوگيا جونىندەگى كونسۋلتانت جاراس تاكەنوۆ، «قوعامدىق ماسەلەلەردى تالداۋ ورتالىعى» قق ديرەكتورى مەرۋەرت ماحمۋتوۆا ءبىلدىردى. بۇدان وزگە اتالعان قۇجاتتىڭ جوباسىنا ماماندىق تاڭداۋ ورتالىعىنىڭ باسشىسى جانتورە كارىموۆتىڭ، قوعامدىق كەڭەس مۇشەسى بەكنۇر كيسيكوۆ، ساياساتتانۋشى ءارى تاۋەكەلدەردى باعالاۋ توبىنىڭ ديرەكتورى دوسىم ساتپايەۆ، تج كەزىندە ءوزىن-وزى ۇيىمداستىرۋ سالاسىنداعى ساراپشى تيمۋر پوچانوۆتىڭ ۇسىنىستارى ەنگىزىلدى.

جيىندى قورىتىندىلاعان ەرجان باباقۇماروۆ بۇل كەزدەسۋدەگى ديالوگتىڭ كونسترۋكتيۆتىلىگىنە ەرەكشە توقتالدى.

قالا اكىمى ب.ساعىنتايەۆتىڭ تاپسىرماسىنا سايكەس ستراتەگيا جوباسى جاقىن ارادا قالا تۇرعىندارىنىڭ تالقىلاۋىنا شىعارىلادى. ساراپشىلار مەن الماتىلىقتاردان كەلىپ تۇسكەن ۇسىنىستار جۇمىس توبىنىڭ وتىرىستارىندا تالقىلانادى. سونىمەن قاتار، قۇجاتتىڭ جوباسى بارلىق ديالوگ الاڭدارىندا، سونىڭ ىشىندە ءماسليحاتتا، قوعامدىق جانە ىسكەرلىك كەڭەستەردە تالقىلاۋعا ۇسىنىلادى.