نەگىزگى ماقسات – ءارتۇرلى سالاداعى بەلسەندى ازاماتتاردى انىقتاۋ جانە جيناقتالعان تاجىريبەنى ەسكەرە وتىرىپ، پارتيالىق ىرىكتەۋدى وتكىزۋ ءتارتىبىن جەتىلدىرۋ. «Nur Otan» پارتياسىنىڭ كادرلىق رەزەرۆىنە 800-گە جۋىق ۇمىتكەر تىركەلگەن، ولاردىڭ 30% ايەلدەر، تاعى 30% 35 جاسقا دەيىنگى ازاماتتار، ولاردىڭ ىشىندە كوپ بالالى انالار، ەرەكشە قاجەتتىلىكتەرى بار ادامدار دا بار.

پيلوتتىق ىرىكتەۋ اياسىندا ۇمىتكەرلەر ءوز باعدارلاماسىمەن قوعامدىق پىكىرسايىستارعا قاتىسادى. كەلەسى كەزەڭ – پارتيا مۇشەلەرىنىڭ اراسىندا داۋىس بەرۋ، سونىڭ نەگىزىندە «Nur Otan» پارتياسىنىڭ كادرلىق رەزەرۆىنە قابىلداۋ ءۇشىن ەڭ ۇزدىك ۇمتىكەرلەر تاڭدالادى.

سونىمەن، اقمولا وبلىسىنىڭ ەسىل اۋدانىندا وتكەن پارتيالىق رەزەرۆكە ۇمىتكەرلەردىڭ اۋىل تۇرعىندارىمەن كەزدەسۋىندە جۇمىس ورىندارىن قۇرۋ، سۋمەن جابدىقتاۋ جەلىسى جانە ينتەرنەتتىڭ باياۋلىعى جايىنداعى سۇراقتار كوتەرىلدى. قىزىلوردا وبلىسىنىڭ سىرداريا اۋدانىندا پارتيا مۇشەلەرى بالالارعا ارنالعان سپورت الاڭدارى مەن دامىتۋ ورتالىقتارىنىڭ جەتىسپەۋشىلىگىن شەشۋگە نيەتتەنىپ وتىر. شىعىس قازاقستان وبلىسىنىڭ بەسقاراعاي اۋدانىندا ۇمىتكەرلەر جولداردى جوندەۋ جانە اۋىلدارداعى كاسىپكەرلىكتى دامىتۋ تاقىرىبىنا توقتالدى. ماڭعىستاۋ وبلىسىنىڭ مۇنايلى اۋدانىندا مەكتەپتەردەگى وقۋشىلارعا ورىننىڭ جەتىسپەۋشىلىگى، كىتاپحانالار اشۋ جانە اۋىل تۇرعىندارىنىڭ دەڭگەيىن كوتەرۋ تۋرالى سۇراقتار كوتەرىلدى.

ايتا كەتۋ كەرەك، ۇمىتكەرلەردىڭ ىشىندە اۋىلشارۋاشىلىق سالاسىنىڭ وكىلدەرى، قوعام بەلسەندىلەرى، اۋىل مەكتەپتەرىنىڭ مۇعالىمدەرى، دارىگەرلەر، مادەنيەت قايراتكەرلەرى، كاسىپكەرلەر جانە ت.ب. بار. قاراعاندى وبلىسىنداعى بەلسەندى ۇمىتكەرلەردىڭ ءبىرى – اباي اۋدانىنىڭ تۇرعىنى ەلەنا سۋتياگينا بولدى.

«مەن قىزمەتىمدى مەكتەپتە فيزيكا-ماتەماتيكا ءمۇعالىمى بولىپ باستادىم. كەيىن ايەلدەردى تۇزەۋ مەكەمەسىنىڭ ديرەكتورى بولىپ ۇزاق ۋاقىت ىستەدىم. تاعدىرى تالكەككە ۇشىراعان تالاي قىزدىڭ باسىنداعى قيىن جاعدايدى كوزىممەن كوردىم. بىرەۋلەرىنىڭ اتا-انالارى جوق، ال بىرەۋلەرگە دۇرىس كوڭىل ءبولىنىپ، جاقسى تاربيە بەرىلمەگەن. ادام تاعدىرىنا اسەر ەتەتىن كوپتەگەن اسپەكتىلەر بار، ولاردىڭ ىشىندەگى ەڭ ماڭىزدىسى – وتباسى. وتباسىنىڭ جايناپ، گۇلدەنۋى ءۇشىن ماڭىزدى بىرنەشە شارتتار بار. ادام جۇمىستان كەلگەندە مەكتەپتە وقيتىن بالالارى ساعىنىپ كۇتىپ وتىراتىن جىلى ءۇيى بولسا، كەشكىسىن ولارمەن ساياباققا قىدىرۋعا شىقسا، مىنە – ءومىر سۇرۋگە جاسالعان قولايلى جاعداي دەگەن وسى. مەنىڭ ويىمشا، «Nur Otan» پارتياسى – وسى جاعدايلاردىڭ شەشىمىن تابا الاتىن باستى قۇرال. ءومىرىمىزدى جاقسى جاققا بىرگە وزگەرتەيىك»، - دەدى ول.

ءوز كەزەگىندە پارتيالىق كادر رەزەرۆىنىڭ تاعى ءبىر ۇمىتكەرى تاتيانا تيتوۆسكايا «Nur Otan» پارتياسى بەلسەندى ازاماتتاردىڭ ويىن ايتا الۋى ءۇشىن ءوز الاڭىن ۇسىنعانىنا ريزاشىلىعىن ءبىلدىردى.

«كەيبىرەۋلەر بىزدە بارلىعى جامان دەيدى. ولاي بولسا، جاقسارتايىق. بارلىعى ىسكە العىسىز با؟ كەلىڭىز، دۇرىستايىق! وسىلاردى ايتۋ ءۇشىن پارتيا بىزگە الاڭ ۇسىنىپ وتىر. ول ءۇشىن پارتيالىق كادر رەزەرۆىنە ۇمىتكەرلەر تاڭداپ جاتىر. ءبىز اباي اۋدانىنىڭ الىس اۋىلدارىنىڭ تۇرعىندارىمەن ونداعان كەزدەسۋلەر وتكىزىپ ۇلگەردىك. جۇرتتى تىڭداپ، ولاردى الاڭداتقان ماسەلەلەردى بىلدىك. پارتيانىڭ قولداۋىمەن ءبىز ولاردىڭ شەشىمىن تابامىز»، - دەپ اتاپ ءوتتى تاتيانا تيتوۆسكايا.