سەمەي قالاسىنىڭ اۋەجايىنا اباي ەسىمىن بەرۋ تۋرالى جانە سەمەي قالاسىنىڭ ءبىلىم بەرۋ مەكەمەلەرىنە تانىمال تۇلعالاردىڭ اتتارىن بەرۋ وبلىستىق ونوماستيكالىق كوميسسيادا ماقۇلدانىپ، شىعىس قازاقستان وبلىستىق ءماسليحاتىنىڭ دەپۋتاتتارى تاراپىنان قولداۋ تاپتى. قۇجاتتار رەسپۋبليكالىق ونوماستيكا كوميسسياسىنا جىبەرىلدى.

ەندى سەمەي قالاسىنىڭ حالىقارالىق اۋەجايى ۇلى ابايدىڭ ەسىمىمەن اتالاتىن بولادى. №49 مەكتەپ تە اقىننىڭ قۇرمەتىنە بەرىلمەك. كەلەسى جىلى ەلىمىز ابايدىڭ 175 جىلدىعىن تويلايدى. ايتۋلى مەرەيتويعا وراي وبلىس كولەمىندە 500-دەن استام شارا وتەدى.

سونداي-اق، وقۋ ورىندارىنا كورنەكتى تۇلعالاردىڭ اتتارى بەرىلەتىن بولادى.  №2 ورتا مەكتەپ – قانىش ساتپايەۆ اتىنا،  №3 مەكتەپ-كەشەن – مۇحتار اۋەزوۆ اتىنا،  №34 مەكتەپ – اتى اڭىزعا اينالعان باتىر باۋىرجان مومىش ۇلىنىڭ قۇرمەتىنە، №37 مەكتەپ-گيمنازياسى – ىبىراي التىنسارين ەسىمىنە،  №39 مەكتەپ – ءاليحان بوكەيحاننىڭ اتىنا، №47 مەكتەپ – احمەت بايتۇرسىنوۆ اتىنا، پريگورود ورتا مەكتەبى – جۇسىپبەك ايماۋىتوۆتىڭ قۇرمەتىنە بەرىلمەك.

بۇل ەلىمىزدىڭ دامۋىنا ۇلەس قوسقان بەلگىلى قازاقستاندىقتارعا قۇرمەت بولىپ تابىلادى. وسكەلەڭ ۇرپاق تاريحتا ويىپ الار ورنى بار تۇلعالاردى تانىپ، ەڭبەكتەرىن ءبىلىپ، ەسىمدەرىن ماڭگى قۇرمەتتەۋلەرى ءتيىس.

سەمەي قالاسىنىڭ اقپاراتتىق ورتالىعى