ىشكى ىستەر ءمينيسترى ەرلان تۇرعىمبايەۆ اۋماقتىق پوليسيا دەپارتامەنتتەرىنىڭ جانە بەيىندى قىزمەتتەردىڭ باسشىلارىمەن كامەلەتكە تولماعاندارعا قاتىستى زورلىق-زومبىلىق قىلمىستارىنىڭ، سونىمەن قاتار جاسوسپىرىمدەر قىلمىسىنىڭ الدىن الۋ ماسەلەلەرىنە ارنالعان جيىن وتكىزدى، – دەپ Qamshy.kz اقپارات اگەنتتىگى حابارلايدى.

ۆەدومستۆونىڭ باسپا ءسوز قىزمەتىنىڭ اقپاراتىنا سۇيەنسەك، مينيستر ءبىرقاتار وڭىرلىك دەپارتامەنتتەردىڭ بالالاردىڭ قاۋىپسىزدىگىن قامتاماسىز ەتۋ، جاسوسپىرىمدەرگە قاتىستى قىلمىستاردىڭ، ونىڭ ىشىندە پايداكۇنەمدىكپەن زورلىق جاساۋ، جىنىستىق سيپاتتا ءتيىسۋ سىندى قىلمىستاردىڭ ءوسۋىنىڭ الدىن الۋ باعىتىنداعى جۇمىستارىنىڭ كەمشىلىكتەرىن ناقتى كورسەتىپ بەردى.

سونداي-اق اقمولا، اقتوبە، الماتى، اتىراۋ جانە جامبىل وبلىستىق پوليسيا دەپارتامەنتتەرىنىڭ باسشىلارى سىنعا ۇشىرادى.

كەڭەس قورىتىندىسىندا ءبىرقاتار باسشى قاتاڭ تارتىپتىك جازاعا تارتىلدى. اتاپ ايتقاندا، جامبىل وبلىستىق پوليسيا دەپارتامەنتىنىڭ باستىعى ارمان ورازالييەۆكە قىزمەتكە تولىق ساي ەمەستىگى ەسكەرتىلدى. ال اقتوبە وبلىستىق پوليسيا دەپارتامەنتىنىڭ باستىعى اتىعاي ارىستانوۆقا قاتاڭ سوگىس جاريالاندى.

ەسكە سالساق، الماتى وبلىستىق پوليسيا دەپارتامەنتىنىڭ باستىعى مۇرات ۇرىمحانوۆقا بۇعان دەيىن دە قاتاڭ سوگىس جاريالانعان ەدى.

ودان وزگە تاراز قالالىق پوليسيا باسقارماسىنىڭ باستىعى ارداق ماديماروۆ قىزمەتىنەن بوساتىلدى. سونداي-اق  تاراز قالالىق پوليسيا باسقارماسى قىزمەتتەرىنىڭ باسشىلارى جازالانىپ، مەكتەپ ينسپەكتورى ىشكى ىستەر ورگاندارىنان قۋىلدى.

ءمينيستردىڭ مالىمدەۋىنشە، بارلىق وڭىرلىك باسشىلارعا جەرگىلىكتى اتقارۋشى ورگاندارمەن بىرلەسىپ، قوردالانعان پروبلەمالى ماسەلەلەردى تىڭعىلىقتى سارالاپ، شەشۋ تاپسىرىلدى. ولاردىڭ قاتارىندا ۋچاسكەلىك پوليسيا مەن مەكتەپ ينسپەكتورلارىنىڭ جۇمىسىن ۇيىمداستىرۋدى وزگەرتۋ، ولاردىڭ ءبىلىم بەرۋ ۇيىمدارىمەن جانە اكىمدىكپەن ءوزارا ىس-ارەكەتى، كۇزەت ۇيىمدارىن مەكتەپتەر مەن بالاباقشالارداعى قاۋىپسىزدىكتى قامتاماسىز ەتۋگە جۇمىلدىرۋ ماسەلەلەرى بار.

«اۋماقتىق دەپارتامەنتتەردىڭ باسشىلارىنىڭ نازارىن پوليسيانى باعالاۋدىڭ نەگىزگى ينديكاتورلارىنىڭ ءبىرى كامەلەتكە تولماعانداردىڭ قىلمىستىق وزبىرلىقتان قورعالۋ دەڭگەيى ەكەندىگىنە اۋدارتامىن. ءدال وسىنى ادامدار بىزدەن كۇتىپ وتىر. ءبىز ولاردىڭ قاۋىپسىزدىگىن قامتاماسىز ەتۋگە مىندەتتىمىز»، – دەدى تۇرعىمبايەۆ.