الماتى قالاسىنىڭ اكىمى باقىتجان ساعىنتايەۆ 22 قاراشا كۇنى الاتاۋ اۋدانى تۇرعىندارىمەن ەكىنشى مارتە كەزدەستى. بۇل – اۋدان تۇرعىندارىمەن وسى جىلداعى ەكىنشى كەزدەسۋ، دەپ جازادى اكىمدىكتىڭ باسپا ءسوز قىزمەتى.

بۇعان دەيىن، 9 تامىزدا «ەركىن ميكروفون» فورماتىنداعى العاشقى كەزدەسۋ وتكەن بولاتىن. ول كەزدە 500-دەن استام ادام جازباشا جانە 400-دەن استام ادام اۋىزشا سۇراق قويعان ەدى. سۇراقتاردىڭ ءبىر بولىگى سول جەردە شەشىمىن تاپتى، قالعاندارىنا ءجىتى ساراپتاما جاسالدى، ونىڭ قورىتىندىسى بويىنشا قالانىڭ ءتۇرلى باسقارمالارى مەن قىزمەتتەرىنە جانە اۋدان اكىمدىگىنە 161 تاپسىرما بەرىلدى.

اۋدانداعى ەڭ وزەكتى ماسەلەنىڭ ءبىرى – جەر تەلىمدەرىن زاڭداستىرۋ بويىنشا 930 پروبلەمالىق ۋچاسكەنىڭ 724ء-ىن راسىمدەۋ جونىندە ناقتىلى شارالار جۇزەگە استى. قالعاندارى بويىنشا قوسىمشا جۇمىستار جۇرۋدە، ويتكەنى ولاردىڭ كەيبىرەۋى سۋ قورعالاتىن ايماققا، كوشەلەردىڭ «قىزىل جيەگىنە»، ەلەكتر وتكىزگىش جەلىلەردىڭ قورعالاتىن اۋماقتارىنا ورنالاسقان.

سونداي-اق باقىتجان ساعىنتايەۆ «جاڭا الماتى» بەسجىلدىق جوcپارى اياسىندا اۋداندى دامىتۋ شارالارى تۋرالى حابارلادى.

كوممۋنالدىق ماسەلە بويىنشا شىلدەدەن باستاپ 315 ءۇي بار «راحات-مادەنيەت» ىقشاماۋدانىندا ۇزىندىعى 2،65 كم بولاتىن گاز قۇبىرىنىڭ قۇرىلىسى جۇرۋدە. گاز قۇبىرى ىسكە قوسىلعاندا «تەپلوەنەرگەتيك» جانە «ەنەرگوسترويتەل» باۋ-باقشا قاۋىمداستىعىنىڭ تاعى 298 ءۇيى گازبەن قامتاماسىز ەتىلەدى. جالپى، اعىمداعى جىلدىڭ اياعىنا دەيىن الاتاۋ اۋدانىندا 4،15 كم گاز جەلىسىن تارتۋ جوسپارلانۋدا.

سونىمەن قاتار «ايگەرىم»، «وجەت»، «14ء-شى اۋماق»، «اقبۇلاق» (اياقتالىپ قالدى)، «شاڭىراق-5»، «سامعاۋ»، «كوك-قاينار»، «شاپاعات»، «العاباس» سەكەلدى توعىز ىقشاماۋداندا ۇزىندىعى 291 كم بولاتىن ينجەنەرلىك جەلى قۇرىلىسى جالعاسۋدا. جانە 156،6 كم سۋ قۇبىرى، 134،5 كم كارىز جەلىسى تارتتىلۋدا. اتالعان جەلىلەر ىسكە قوسىلعاندا الاتاۋ اۋدانىنىڭ تۇرعىندارىننىڭ 85 پايىزدان استامى اۋىز سۋمەن قامتىلماق.