تۇركىستان وبلىسىنىڭ قازىعۇرت اۋدانىندا 4 كولىك سوقتىعىسىپ، 15 ادام جاراقاتتاندى. زارداپ شەككەن 8 ادام جانساقتاۋ بولىمىندە جاتىر، – دەپ Qamshy.kz اقپارات اگەنتتىگى حابارلايدى.

وقيعا بۇگىن قازىعۇرت اۋدانى اۋماعىنداعى تراسسادا بولعان. سوقتىعىسقان 4 كولىك ءبىر باعىتتا بارا جاتقان. جول اپاتىنان كەيىن اۆتوكولىكتەردىڭ بىرىنەن ءورت شىققان. وقيعا سالدارىنان 15 ادام زارداپ شەگىپ، ولاردىڭ 14ء-ى قازىعۇرت اۋداندىق اۋرۋحاناسىنا جەتكىزىلدى.

وبلىستىق دەنساۋلىق ساقتاۋ باسقارماسىنىڭ مالىمدەۋىنشە، جاراقات العان 8 ادامنىڭ جاعدايلارى اۋىر كۇيدە.

 "ولار تەز ارادا جانساقتاۋ بولىمىنە جاتقىزىلىپ، وتا جاسالۋدا. كومەككە سانيتارلىق اۆياسيامەن ءبىر توپ نەيروحيرۋرگ شاقىرتىلدى. شىمكەنتتەن جەتكەن ماماندار ناۋقاستارعا وپەراسيا جاساپ جاتىر. تاعى 3 ادام اۋرۋحانانىڭ جاراقات بولىمىنە جاتقىزىلدى. 4 ادامعا العاشقى مەديسينالىق كومەك كورسەتىلىپ، ولار ۇيلەرىنە قايتارىلدى"، –  دەپ باسقارمانىڭ باسپا ءسوز حاتشىسى ساۋلە الجانبايەۆا مالىمدەمە جاسادى.

وقيعا ورنىنا تۇركىستان وبلىسى پد باستىعى پوليسيا گەنەرال-مايورى قايرات دالبەكوۆ بارىپ، اۋداندىق اۋرۋحاناعا تۇسكەن زارداپ شەككەندەردىڭ جاعدايىمەن تانىستى.

"بۇل رەسپۋبليكالىق ماڭىزى بار جول. جول-كولىك وقيعاسى كوكتايعاق سالدارىنان بولدى. سوندىقتان جۇرگىزۋشىلەرگە جول ءجۇرۋ ەرەجەلەرىن ساقتاۋ، جىلدامدىقتى اسىرماۋ، مانيەۆر جاساۋ ەرەجەلەرىن بۇزباۋ، بىر-بىرىنە قۇرمەتپەن قاراۋ، جول بويىندا ورنالاسقان جول بەلگىلەرىنە نازار اۋدارۋ قاجەت ەكەندىگىن ەسكەرتەمىز"، –  دەدى دالبەكوۆ.