ەلىمىزدىڭ ءاربىر ايماعى، ەڭ شالعاي اۋداندارى مەن اۋىلدارىن دامىتۋدىڭ وزەكتى ماسەلەلەرىن تالقىلاۋ ءۇشىن «Nur Otan» ەلوردادا بارلىق ايماقتىق فيليال وكىلدەرىن جينادى. پرەزيدەنت اكىمشىلىگىنىڭ، ۇكىمەت پەن «Nur Otan» پارتياسىنىڭ باسشىلىعى پارتيا مۇشەلەرىنە مەملەكەتتىك ساياساتتى دامىتۋدىڭ نەگىزگى باعىتتارى، سايلاۋالدى باعدارلامانى جۇزەگە اسىرۋ جانە ەلدىڭ جەتەكشى ساياسي كۇشىنىڭ جۇمىسىن قايتا جاڭعىرتۋ بويىنشا قابىلدانعان شارالار تۋرالى ايتىپ بەردى. پارتيالىقتار ءۇشىن العاش رەت ارنايى وقۋ-جاتتىعۋ توبىنىڭ وتىرىسى ۇيىمداستىرىلدى.

«Nur Otan» پارتياسىنىڭ ليدەرى نۇرسۇلتان نازاربايەۆ پارتيانىڭ مۇشەلەرىن توپتاستىرۋ جانە قاتارىمىزعا باسقا دا بەلسەندى ازاماتتاردى تارتۋ مىندەتىن قويعانىن بىلەسىزدەر. پارتيانىڭ ءوز ىشىندەگى دەموكراتيانى دامىتۋعا دا ەرەكشە كوڭىل ءبولىندى. 14 وڭىردە پارتيانىڭ كادرلىق رەزەرۆىنە ىرىكتەۋ بويىنشا پيلوتتىق جوبا جۇرگىزىلدى. مەملەكەت باسشىسى قاسىم-جومارت توقايەۆتىڭ تاپسىرماسىمەن ۇكىمەت وڭىرلەردى دامىتۋعا قوماقتى قاراجات بولەدى. پارتيانىڭ مىندەتى – جەرگىلىكتى جەرلەردە قاراجاتتىڭ ءتيىمدى جۇمسالۋىنا قاتىستى جۇرتشىلىقتى حاباردار ەتە وتىرىپ، حالىقتىڭ ءومىر ءسۇرۋ ساپاسىنا تىكەلەي اسەر ەتەتىن جوبالاردىڭ ىسكە اسىرىلۋىنا قوعامدىق جانە پارتيالىق باقىلاۋدى ۇيىمداستىرۋ»، - دەدى ءوز سوزىندە «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك.
الداعى جىلى ەلىمىزدىڭ اقپاراتتىق-ساياسي كۇن تارتىبىندە تۇرعان نەگىزگى باعىتتار تۋرالى پرەزيدەنت اكىمشىلىگى باسشىسىنىڭ ءبىرىنشى ورىنباسارى دارحان كالەتايەۆ ايتتى.

«كەلەر جىلعا ارنالعان يدەولوگيالىق مىندەتتەردىڭ نەگىزگى بولىگى – «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ، ۇلتتىق قوعامدىق سەنىم كەڭەسىنىڭ قىزمەتى، ادام قۇقىقتارى سالاسىندا رەفورمالار مەن ءىس-شارالار ازىرلەۋ، سونىمەن قاتار 2025 جىلعا دەيىنگى ازاماتتىق قوعامدى دامىتۋدىڭ ورتا مەرزىمدى تۇجىرىمداماسىن قابىلداۋ. وسى اتالعانداردىڭ بارلىعى پارتياىشىلىك الاڭداردا تولىققاندى تالقىلانىپ، ولار بويىنشا ەگجەي-تەگجەيلى ۇسىنىستار دايىنداۋ كەرەك دەپ ەسەپتەيمىن» - دەپ اتاپ ءوتتى دارحان كالەتايەۆ پارتيا مۇشەلەرىمەن كەزدەسۋدە.
پرەمەر-مينيستردىڭ ءبىرىنشى ورىنباسارى ءاليحان سمايىلوۆ ءوز ءسوزىن ەلباسىنىڭ ستراتەگيالىق باستامالارىن ىسكە اسىرۋ مەن مەملەكەت باسشىسىنىڭ قازاقستاندىقتاردىڭ تۇرمىسى مەن ءال-اۋقاتىن جاقسارتۋعا باعىتتالعان تاپسىرمالارىنا ارنادى. ۇكىمەت قالالاردىڭ شەت ايماقتارىن مەن ينجەنەرلىك ينفراقۇرىلىمدى دامىتۋعا جانە جاڭا تەحنولوگيالاردى ەنگىزۋگە بولىنەتىن قارجىنى كوبەيتۋدى كوزدەپ وتىر. 2024 جىلعا قاراي ايماقتاردى دامىتۋدىڭ جاڭا ستاندارتىنا سايكەس، 3477 اۋىلدى اۋىز سۋمەن قامتاماسىز ەتۋ، جولدارىن جوندەۋ، الەۋمەتتىك نىساندار سالۋ ارقىلى جاڭارتۋ جوسپارلانعان.

پرەمەر-مينيستردىڭ ورىنباسارى بەردىبەك ساپاربايەۆتىڭ ايتۋىنشا، قالا مەن اۋىلدىڭ ءبىلىم بەرۋدەگى، سپورتتىق قۇرىلىستاردىڭ قول جەتىمدىلىگىندەگى الشاقتىقتى جويۋ بويىنشا جۇمىستار جالعاسۋدا.
دەنساۋلىق ساقتاۋ مەكەمەلەرىن مەديسينالىق تەحنيكامەن جابدىقتاۋ دەڭگەيىن 70%-عا جانە ودان دا جوعارى دەڭگەيگە جەتكىزۋ جوسپارلانعان. 2020 جىلى مۇعالىمدەردىڭ جالاقىسى 25%-عا، مادەنيەت، ونەر جانە مۇراعات قىزمەتكەرلەرىنىكى ورتاشا ەسەپپەن 30%-عا كوتەرۋ كوزدەلۋدە. ال دارىگەرلەردىڭ ەڭبەكاقىسىن 30%، مەدبيكەلەرگە 20%-عا كوبەيتىلەدى دەپ كۇتىلىپ وتىر.

ءوز كەزەگىندە ۆيسە-پرەمەر رومان سكليار پارتيا مۇشەلەرىمەن كەزدەسۋدە جەرگىلىكتى ماڭىزى بار اۆتوكولىك جولدارىن جوندەۋ، شالعايداعى ەلدى مەكەندەر مەن اۋىلداردى سۋمەن جابدىقتاۋ جوسپارلارىنا جەكە-جەكە توقتالدى.