شىعىس قازاقستان وبلىسىندا بۇيرەكتىڭ قاتەرلى ىسىگىنە روبوتتاندىرىلعان وتا جاسالدى، – دەپ Qamshy.kz اقپارات اگەنتتىگى حابارلايدى، وبلىستىق كوپ سالالى ونكولوگيا جانە حيرۋرگيا ورتالىعىنىڭ باسپا ءسوز قىزمەتىنە سىلتەمە جاساپ.

وبلىستىق كوپ سالالى ونكولوگيا جانە حيرۋرگيا ورتالىعىنىڭ ونكولوگ دارىگەرلەرى ونكوۋرولوگيادا روبوتتاندىرىلعان حيرۋرگيانى ەنگىزدى. وڭىردە عانا ەمەس، قازاقستاندا تۇڭعىش رەت بۇيرەكتىڭ قاتەرلى ىسىگىنە روبوتتاندىرىلعان وتا جاسالدى.

"روبوتتاندىرىلعان ادرەنالەكتوميا 64 جاستاعى ناۋقاسقا جاسالدى. ول وڭ جاق بۇيرەكتىڭ قاتەرلى ىسىگىنە شالدىققان. 40 مينۋتقا سوزىلعان وتانى دارىگەر حۋسان ءومىرزاقوۆ پەن ونىڭ اسسيستەنتتەرى اسقار يبرايەۆ جانە سايان ساعيدۋللين جاسادى. قازىرگى ۋاقىتتا ەمدەلۋشىنىڭ جاعدايى قاناعاتتانارلىق"، – دەپ ورتالىقتىڭ باسپا ءسوز قىزمەتى ءمالىم ەتتى.

ادرەنالەكتوميا – وتە كۇردەلى حيرۋرگيالىق وتا. ورگاننىڭ گورمانالدى-بەلسەندى ىسىكتەرى كەزىندە جاسالادى. مۇنداي قاتەرلى ىسىك ىشكى سەكرەسيا مەن زات الماسۋدىڭ بۇزىلۋىنا، گيپەرتەنزياعا جانە باسقا دا ءقاۋىپتى جاعدايعا الىپ كەلۋى مۇمكىن. وتا كەزىندە بەزدى ورگانعا جاسالاتىن مانيپۋلياسيالاردىڭ قىر-سىرىن بىلۋمەن قاتار، ەندوكرينولوگيالىق وزگەرىستەردىڭ ەرەكشەلىكتەرىن دە جەتە ءبىلۋ قاجەت.