«بولاشاق» كورپوراتيۆتىك قورى قامقورشىلىق كەڭەسىنىڭ قۇرمەتتى مۇشەسى باۋىرجان بايبەك تۇڭعىش پرەزيدەنت نۇرسۇلتان نازاربايەۆتىڭ باستاماسىمەن قولعا الىنعان «بولاشاق» باعدارلاماسىنىڭ ارقاسىندا قازاقستاندىق مىڭداعان جاسقا الەمنىڭ ەڭ وزىق وقۋ ورىندارىندا ساپالى ءبىلىم الۋعا مۇمكىندىك بەرىلگەنىن تىلگە تيەك ەتتى. 2011 جىلى باعدارلاما تۇلەكتەرى ارنايى قور قۇردى. قور بالالارعا ارنالعان قايىرىمدىلىق جانە ءبىلىم بەرۋ جوبالارىنان بولەك، مەملەكەتتىك ءتىلدى ناسيحاتتاۋدى دا ءوز مىندەتىنە العان-دى.
«8 جىل ىشىندە ەل بولاشاعىنا بەيجاي قارامايتىن دەمەۋشىلەر مەن قامقور جانداردىڭ قولداۋىنىڭ ارقاسىندا، بالالارىمىزعا ارنالعان 33ء-ى گولليۆۋدتىق ءفيلمدى مەملەكەتتىك تىلگە اۋداردىق. 2011 جىلى جوبا العاش ىسكە قوسىلعان كەزدە ەلىمىزدىڭ تۇڭعىش پرەزيدەنتى نۇرسۇلتان نازاربايەۆ بۇل ءىسىمىزدى قولدادى. ەلباسى جاڭا مازمۇن ارقىلى قازاق ءتىلىن دامىتۋعا جاعداي جاساۋدىڭ ماڭىزدىلىعىنا توقتالعان بولاتىن. بۇل تۋرالى مەملەكەت باسشىسى قاسىم-جومارت توقايەۆ تا ايتتى. سوندىقتان، ءبىر اي بۇرىن عانا «Nur Otan» پارتياسى تاراپىنان مەملەكەتتىك ءتىلدى ناسيحاتتاۋدىڭ ءتيىمدى تەتىكتەرىن ازىرلەۋ ءۇشىن ارنايى توپ قۇردىق. وسى ورايدا، «وزىڭنەن باستا» جوباسىنىڭ بارلىق قاتىسۋشىسىنا العىسىمدى بىلدىرەمىن. فيلمدەردى اعىلشىن تىلىنەن قازاق تىلىنە دۋبلياجداۋ كەزىندە ءبىزدىڭ اۋدارماشىلارىمىز قازاق ادەبيەتى كلاسسيكتەرىنىڭ شىعارمالارىنان ۇزىندىلەر كەلتىرەدى. بۇل فيلمدە ابايدىڭ «كۇز» جانە «عاشىقتىڭ ءتىلى ءتىلسىز» ولەڭدەرىن تىڭداي الاسىزدار. ولاي بولسا، اتاقتى گولليۆۋدتىق ءفيلمدى انا تىلىمىزدە تاماشالاۋعا بارشا قازاقستاندىقتاردى شاقىرامىن»، - دەدى باۋىرجان بايبەك. 
«بولاشاق» قامقورشىلىق كەڭەسىنىڭ ءتورايىمى دينارا ءشايجۇنىسوۆانىڭ ايتۋىنشا، ەرىك-جىگەرى مۇقالماعان ەكى قىزدىڭ ءومىرى تۋرالى باياندايتىن بۇل كارتينانىڭ تاقىرىبى ءبىزدىڭ ەلىمىز ءۇشىن دە وزەكتى. ويتكەنى، بۇگىنگى تاڭدا قازاقستاندىق ايەلدەردى ەلدىڭ قوعامدىق-ساياسي ومىرىنە بەلسەندى قاتىسۋعا شاقىرىپ جاتقانى بەلگىلى. وسىدان بىرنەشە كۇن بۇرىن «Nur Otan» پارتياسىنىڭ الاڭىندا نۇرسۇلتان نازاربايەۆ ءاربىر ءماسليحاتتىڭ سايلاۋالدى پارتيالىق ءتىزىمىنىڭ كەم دەگەندە 30% -ىن ايەلدەر قۇراۋى كەرەك دەپ اتاپ وتكەن بولاتىن.
«بۇگىنگى تاڭدا ايەل - انا، جۇباي، قىز عانا ەمەس، سونىمەن قاتار، جۇمىسشى، قىزمەتكەر، باسشى سياقتى كوپتەگەن الەۋمەتتىك رولدەردى دە اتقارىپ ءجۇر. مۇنداي فيلمدەر قىزدارعا باتىل، سەنىمدى بولۋمەن قاتار، جاقىندارىڭ مەن ءومىر ءسۇرىپ وتىرعان قوعامداعى بەيبىتشىلىكتى باعالاي ءبىلۋدىڭ ماڭىزدىلىعىن كورسەتەدى »، - دەدى دينارا ءشايجۇنىسوۆا. 
ديسنەيدىڭ 6 جىل بۇرىن تۇسىرىلگەن ۇزدىك تۋىندىسى – «مۇزدى ولكە» ءفيلمىنىڭ جالعاسى ءقازىردىڭ وزىندە الەمدىك پروكاتتا ەڭ كوپ قارجى جيناعان ونىمدەر قاتارىنا ەنىپ وتىر. سىنشىلاردىڭ پىكىرىنشە، ەكىنشى ءفيلمنىڭ جەلىسى كۇردەلەنە تۇسكەن.
ءوز كەزەگىندە، دۋبلياج كومانداسىنداعىلاردىڭ ايتۋىنشا، باستى كەيىپكەردىڭ رولىنە لايىقتى اكتريسا تابۋ دۋبلياج تاريحىندا ەڭ قيىن جانە ۇزاق جۇمىس بولعان. كاستينگتە نۇر-سۇلتان، الماتى جانە قاراعاندى قالالارىنان 40-تان استام اكتەر قاتىسىپ، ناتيجەسىندە باستى كەيىپكەر اننا نازەركە سەرىكبول قىزىنىڭ، ال ەلزا بەگىمنۇر حاليلانىڭ داۋىسىمەن «سويلەدى».
BI Group قۇرىلىس حولدينگىنىڭ وكىلى قايرات شاياحمەتوۆتىڭ ايتۋىنشا، كومپانيا الەۋمەتتىك ماڭىزى بار جوبالارعا ەرەكشە ءمان بەرەدى. سوندىقتان BI Group وسىنداي ماڭىزدى جوباعا ريزاشىلىقپەن ات سالىسادى.
«وزىڭنەن باستا» جوباسىن اياسىندا قازاق تىلىنە 33 گولليۆۋد كينوكارتينا دۋبلياجدالدى. ولاردىڭ ىشىندە «كولىكتەر 2»، «كەك الۋشىلار: الترون ءداۋىرى»، «باتىل جۇرەك»، «كوكو قۇپياسى»، «موانا»، «مالەفيسەنتا»، «الاددين»، ت.ب. فيلمدەر بار. قازاق ءتىلى تۇرىك تىلىنەن كەيىن دۋبلياجدا ەكىنشى تۇركى ءتىلى بولىپ تۇر جانە "Walt Disney" كومپانياسىنىڭ تاريحىندا 39-شى؛ "Sony Pictures" ءۇشىن — 7ء-شى ورىندا. شىعىس ەۋروپا مەن تمد ەلدەرى ءۇشىن شىعارىلاتىن Blu-Ray-دا كورۋگە ارنالعان قولجەتىمدى گولليۆۋدتىق فيلمدەردىڭ 7 نەگىزگى تىلدەر قاتارىنا كىردى.
«وزىڭنەن باستا» جوباسىنىڭ سەرىكتەسى - رەسەي مەن تمد-داعى ەڭ ءىرى ivi ونلاين-كينوتەاترى، مۇندا ارنايى بولىمدە قازاق تىلىنە دۋبلياجدالعان گولليۆۋدتىق كارتينالاردى كورۋگە بولادى. 
پىكىر قالدىرۋ