ءبىلىم جانە عىلىم ءمينيسترى اسحات ايماعامبەتوۆتىڭ ايتۋىنشا، ماتەريالدىق ىنتالاندىرۋ تەتىگى رەتىندە ءبىرىنشى كەزەكتە مۇعالىمدەردىڭ جالاقىسىن ءتورت جىلدىڭ ىشىندە ەكى ەسەگە ارتتىرۋ جوسپارلانىپ وتىر. وسى باستاماعا ديرەكتورلار مەن ادىسكەرلەر دە ىلىگەدى.
– بۇگىندە ديرەكتورلار، ولاردىڭ ورىنباسارلارى مەن ادىسكەرلەردىڭ جالاقىسى تومەن. ولار وزدەرىنىڭ بىلىكتىلىگىنە ساي ۇستەماقى الىپ جاتقان جوق. سوندىقتان وسى ماسەلەنى دە زاڭ جوباسى اياسىندا شەشۋدى قاراستىرىپ وتىرمىز. بىرىنشىدەن، وسى ارىپتەستەرىمىز باسقا دا ۇستازدار سياقتى ەڭبەكاقىسى ەكى ەسە كوتەرىلەتىن تۇلعالاردىڭ قاتارىنا ەنىپ وتىر. ەكىنشىدەن، ولار ءوز كاتەگورياسىنا سايكەس ءتيىستى ۇستەماقى الادى. ول 30-50 پروسەنت شاماسىندا بولادى، – دەدى ايماعامبەتوۆ ءماجىلىستىڭ پلەنارلىق وتىرىسىندا.
ونىڭ سوزىنە قاراعاندا، زاڭ جوباسى اياسىندا تاعى ءبىر ماڭىزدى ماسەلەنى شەشۋ كوزدەلگەن. ول – كوللەدج مۇعالىمدەرىنىڭ كاتەگوريالارىنا ۇستەماقى تولەۋ. بۇدان بولەك، ماگيستر اتاعى بار ماماندار مەكتەپكە كەلسە، ولارعا 10 ايلىق ەسەپتىك كورسەتكىش (25 250 تەڭگە) كولەمىندە قوسىمشا اقى بەرۋ كوزدەلگەن.
– جالپى، وسى نورمالاردى جۇزەگە اسىرۋ ءۇشىن بەس جىلعا 5،3 تريلليون تەڭگە بەرىلەتىن بولادى، – دەدى ايماعامبەتوۆ.
ايتا كەتەيىك، كەشە ءماجىلىس دەپۋتاتتارى "پەداگوگ مارتەبەسى تۋرالى" زاڭ جوباسىن ءبىرىنشى وقىلىمدا ماقۇلدادى. وسى جوباسى 19 باپتان تۇرادى. نەگىزگى ءتورت باعىتى:
- ۇستازداردىڭ قۇقىقتارىن كەڭەيتۋ جانە وزىنە ءتان ەمەس جۇمىستان بوساتۋ، جۇكتەمەنى ازايتۋ؛
- ءمۇعالىمنىڭ قىزمەتىنە قويىلاتىن تالاپتاردى كۇشەيتۋ؛
- ماتەريالدىق ەمەس ىنتالاندىرۋ؛
- ماتەريالدىق ىنتالاندىرۋ.
پىكىر قالدىرۋ