يراك تۇرمەسىنەن 14 قازاقستاندىق بالا ەلگە قايتارىلدى، – دەپ حابارلايدى Qamshy.kz اقپارات اگەنتتىگى، سىرتقى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ.
مەملەكەت باسشىسى قاسىم-جومارت توقايەۆتىڭ تاپسىرماسى بويىنشا جۇزەگە اسىرىلعان گۋمانيتارلىق اكسيا ناتيجەسىندە قازاقستانعا يراك تۇرمەسىندە ءوز انالارىمەن جاتقان 14 قازاقستاندىق بالا قايتارىلدى. قازىرگى تاڭدا ولاردىڭ انالارى سوتتالىپ، تۇرمەدە تەرروريستىك ارەكەتكە قاتىستىلىعى ءۇشىن جازاسىن وتەپ جاتىر.
گۋمانيتارلىق اكسيا بالالاردىڭ انالارى مەن تۋعان-تۋىستارىنىڭ سۇراۋى بويىنشا سىرتقى ىستەر مينيسترلىگى ءبىرقاتار مەملەكەتتىك ورگاندارمەن، وتاندىق ۇكىمەتتىك ەمەس قۇرىلىمدارمەن جانە حالىقارالىق ۇيىمدارمەن تىعىز بايلانىسا وتىرىپ جۇزەگە اسىردى.
قۇجاتتاندىرۋ ۇدەرىسى مەن وڭالتۋ كەزەڭى اياقتالعاننان كەيىن بالالار ءوز تۋىستارىمەن قاۋىشادى.
"يراكتىڭ بيلىگىنە جانە وسى اكسيانى جۇزەگە اسىرۋعا اتسالىسقان بارلىق تۇلعالار مەن ۇيىمدارعا كورسەتكەن كومەگى مەن قولداۋى ءۇشىن شىنايى العىسىمىزدى بىلدىرەمىز"، – دەپ سىرتقى ىستەر ءمينيسترىنىڭ ورىنباسارى ەرجان اشىقبايەۆ ايتتى.
پىكىر قالدىرۋ