سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ءبىرىنشى ورىنباسارى ولجاس بەكتەنوۆ ەندى مەملەكەتتىك قىزمەتتەگى باسشىلار وزىنە باعىنىشتى قىزمەتكەرلەر سىبايلاس جەمقورلىق قىلمىسىن جاساعان جاعدايدا وتستاۆكاعا كەتۋگە مىندەتتى ەكەنىن ايتتى، – دەپ حابارلايدى Qamshy.kz اقپارات اگەنتتىگى.
بەكتەنوۆ "قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك قىزمەت جانە سىبايلاس جەمقورلىققا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭعا ەنگىزىلگەن جاڭاشىلدىقتى ءتۇسىندىردى.
"بۇل زاڭنىڭ قابىلدانۋى قازاقستاندا سىبايلاس جەمقورلىققا قارسى كۇرەستىڭ جاڭا كەزەڭى باستالعانىن بىلدىرەدى. تاۋەلسىز قازاقستان تاريحىندا تۇڭعىش رەت باسشىلاردىڭ قول استىنداعى قىزمەتكەرلەرى ءۇشىن جاۋاپكەرشىلىگى زاڭنامالىق دەڭگەيدە بەكىتىلدى"، – دەدى سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ءبىرىنشى ورىنباسارى.
ونىڭ ايتۋىنشا، ساياسي مەملەكەتتىك قىزمەتشىلەر – مينيسترلەر مەن ولاردىڭ ورىنباسارلارى، وبلىستاردىڭ، نۇر-سۇلتان، الماتى، شىمكەنت قالالارى مەن وبلىس اكىمدەرى مەن ولاردىڭ ورىنباسارلارى، اۋدان اكىمدەرى تىكەلەي باعىنىشتى قىزمەتكەرلەرى سىبايلاس جەمقورلىق جاساسا، مىندەتتى تۇردە وتستاۆكاعا شىعۋى قاجەت.
"زاڭنىڭ جاڭا رەداكسياسىنا سايكەس، ءبىرىنشى باسشى ونىڭ تىكەلەي باعىنىشتى قىزمەتكەرىنە قاتىستى سوتتىڭ ايىپتاۋ ۇكىمى كۇشىنە ەنگەننەن سوڭ، 10 كۇنتىزبەلىك كۇن ىشىندە نەمەسە اقتالمايتىن نەگىزدەر بويىنشا قىلمىستىق ءىس توقتاتىلعاننان كەيىن وتستاۆكاعا كەتۋگە مىندەتتى"، – دەپ ولجاس بەكتەنوۆ ايتتى.
پىكىر قالدىرۋ