الماتى قالاسىنىڭ اكىمى باقىتجان ساعىنتايەۆ جۋرناليستەردىڭ قازاقستان پرەزيدەنتى قاسىم-جومارت توقايەۆ قول قويعان "قىزمەتكەرى پارامەن ۇستالعان باسشىنى جاۋاپقا تارتۋ" تۋرالى زاڭىنا قاتىستى قويعان سۇراعىنا جاۋاپ بەردى. ساعىنتايەۆقا بۇگىن، 29 قاراشادا نۇر-سۇلتانداعى ورتالىق كوممۋنيكاسيالار قىزمەتىندە ءوتىپ جاتقان بريفينگتە جۋرناليستەر "ەگەر قول استىڭىزداعى قىزمەتكەر پارامەن ۇستالعان جاعدايدا وتستاۆكىگە كەتەسىز بە؟" دەگەن ساۋال قويعان.
الماتى اكىمى جۋرناليستەردىڭ بۇل سۇراعىنا "قۇداي ساقتاسىن، ءبىراق قول استىمداعى قىزمەتكەرلەر پارامەن ۇستالعان جاعدايدا زاڭ بويىنشا وتستاۆكاعا كەتۋگە ءماجبۇرمىن" دەپ جاۋاپ بەردى. ونىڭ ايتۋىنشا، وتستاۆكانى قابىلداۋ-قابىلداماۋ تۋرالى شەشىم پرەزيدەنتتىڭ ەنشىسىندە.
28 قاراشادا پرەزيدەنت توقايەۆ "قىزمەتكەرى پارامەن ۇستالعان باسشىنى جاۋاپقا تارتۋ" تۋرالى زاڭعا قول قويدى. جەمقورلىققا قارسى ءىس-قيمىل اگەنتتىگى توقايەۆ قول قويعان بۇل زاڭ بويىنشا "مەملەكەتتىك قىزمەتكەرلەر: مينيسترلەر، ولاردىڭ ورىنباسارلارى، نۇر-سۇلتان، الماتى، شىمكەنت قالاسى، اۋدان اكىمدەرى مەن ولاردىڭ ورىنباسارلارى وزدەرىنە تىكەلەي باعىناتىن قىزمەتكەرلەرى پارامەن ۇستالسا، وتستاۆكاعا كەتۋگە ارىز جازۋى ءتيىس" دەپ مالىمدەگەن. اقوردا سايتى زاڭنىڭ تولىق ءماتىنى جاقىن ارادا باسپا ءسوز بەتىنە جاريالاناتىنىن حابارلاعان.
پىكىر قالدىرۋ