بۇگىن، 3 جەلتوقساندا جامبىل وبلىسىنىڭ اكىمى اسقار مىرزاحمەتوۆتىڭ وكىمىمەن جامبىل وبلىسىنىڭ ورتالعى تاراز قالاسىنا ايتقازى قارابالايەۆ اكىم بولىپ تاعايىندالدى. بۇل وكىمگە قازاقستان پرەزيدەنتى اكىمشىلىگى مەن تاراز قالاسىنىڭ ءماسليحاتى كەلىسىمىن بەرگەن.
1966 جىلى تۋعان ايتقازى قارابالايەۆ بۇل لاۋازىمعا تاعايىندالارعا دەيىن "قازترانسگاز ايماق" تۇركىستان وبلىستىق وندىرىستىك فيليالىنىڭ ديرەكتورى بولدى. قارابالايەۆ ءار جىلدارى جامبىل وبلىسىنداعى جۋالى جانە تالاس اۋداندارىندا اكىم بولعان. ول تاراز قالاسى اكىمىنىڭ ورىنباسارى، جامبىل وبلىستىق جەرگىلىكتى بيۋدجەتتەرگە الىمدار جانە جەكەلەگەن سالىق تولەمدەرىن جيناۋ اگەنتتىگىنىڭ ديرەكتورى، جامبىل وبلىسى اكىمدىگىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار دەپارتامەنتىنىڭ ديرەكتورى، جامبىل وبلىسى اكىمى اپپاراتى جەتەكشىسىنىڭ ورىنباسارى قىزمەتتەرىن دە اتقارعان.
بۇعان دەيىن تاراز قالاسىنىڭ اكىمى بولعان قايرات دوسايەۆ قازاقاستان پرەزيدەنتى قاسىم-جومارت توقايەۆتىڭ تاپسىرماسىنا سايكەس تاراز قالاسىنداعى مەكتەپتەردىڭ بىرىندە ورىن العان وقۋشىنىڭ زورلانۋ وقيعاسىنا بايلانىستى 21 قاراشادا تاراز قالاسىنىڭ اكىمى لاۋازىمىنان بوساتىلعان بولاتىن.
پىكىر قالدىرۋ