وزىق وتىز ەلدىڭ قاتارىنا ۇمتىلعان جۇرتتا ەندى 1،25 ميلليون جەكە كاسىپكەر تۇرادى. تىركەلگەنى، البەتتە. بۇل تۋرالى Qamshy.kz اقپارات اگەنتىگى Ranking.kz. سايتىنا سىلتەمە جاساپ حابارلايدى.

قارجىگەر مامانداردىڭ ايتۋىنشا، بۇعان سەبەپ – ەلدەگى ميكروقارجى ۇيىمدارى (مقۇ) كرەديتتەرىنىڭ ۇلەس سالماعىنىڭ ۇزدىكسىز ءوسۋى نەگىز بولۋدا. رەسمي مالىمەتتەرگە سۇيەنسەك، قازاقستانداعى مقۇ كرەديتتەرى 38 پايىزعا دەيىن ءوسىپ وتىر.

دالىرەك ايتقاندا، سوڭعى توقسانداعى مقۇ-نىڭ جيىنتىق نەسيە پورتفەلى ايتارلىقتاي ءوسىپ، بيىلدىڭ ەكىنشى توقسانى بويىنشا 258،1 ملرد. تەڭگەگە جەتتى. ءبىر جىلداعى ءوسىم شامامەن 40 پايىزعا جۋىقتاعان.

بۇل تۇستا تاعى ءبىر ۇلەسىن جۇزدىكتىڭ ۇستىنە ۇستەگەن كورسەتكىشتى ايتا كەتۋىمىز كەرەك. ايتالىق، وسى جىلدىڭ ەكىنشى توقسانىندا ۇلتتىق بانككە 165 ميكروقارجى ۇيىمى ەسەپ بەرگەن.

مۇندايدا، قارجىلىق ساۋاتتىلىعى جوعارى وقىرماننىڭ مۇنشا كوپ ۇيىمنىڭ كوش باسىنداعى توپ-10 نۇسقاسىن بىلگىسى كەلەتىنى زاڭدىلىق. اتاپ ايتار بولساق، ولار: «Solva»، «تويوتا فاينانشل»، «شينحان فينانس»، «بەرەكە»، «ىرىس»، «ازياتسكيي كرەديتنىي فوند»، «كمF»، «ريس كىزىلوردا»، «ارنۋر كرەديت»، «ERG Microfinanse» بولىپ وندىقتا تۇر.

قورىتا ايتقاندا، ەلدەگى ميكروقارجى ۇيىمدارىنىڭ ۇلەس سالماعىنىڭ مۇنشا تەز ارتۋىنا ەكى فاكتور سەبەپ بولىپ وتىرعانعا ۇقسايدى. ونىڭ العاشقىسى، ارينە، اتالمىش ۇيىمداردىڭ قاي تۇرعىدان العاندا دا كاسىپ اشقىسى كەلەتىن قاراپايىم حالىققا قولجەتىمدىلىگى دەۋگە بولادى.

ال كەلەسى فاكتورعا كەلسەك، الىس ايماقتاردا ەكىنشى دەڭگەيلى بانك فيليالدارىنىڭ از بولۋى سەبەپ بولىپ وتىر. بۇنداي جاعدايدا ۇلەس سالماعى كۇن سايىن ارتىپ بارا جاتقان جەكە كاسىپكەرلەر ءۇشىن ءوز بيزنەسىن دوڭگەلەتۋدە ميكروقارجى ۇيىمدارعا جۇگىنگەن الدەقايدا ءتيىمدى ەكەنى بەلگىلى.

قوزىباي قۇرمان