16 جەلتوقساندا الماتى مەن نۇر-سۇلتان قالاسىندا رۇقسات ەتىلمەگەن شەرۋ وتكىزبەك بولدى دەگەن كۇدىكپەن 55 ادام ۇستالعان. بۇل تۋرالى قازاقستان ىشكى ىستەر مينيسترلىگىنىڭ باسپا ءسوز قىزمەتى حابارلادى.

مينيسترلىكتىڭ حابارلاۋىنشا، باس پروكۋراتۋرانىڭ ەسكەرتۋىنە قاراماستان، نۇر-سۇلتان مەن الماتى قالالارىندا ازاماتتار زاڭسىز شارا وتكىزگەن.

"باس پروكۋراتۋرانىڭ ەسكەرتۋىنە قاراماستان، كەي ازاماتتار ارانداتۋشىلىققا ۇشىراپ، زاڭسىز اكسيالارعا قاتىستى. نۇر-سۇلتاندا ونداعان ازامات رەسپۋبليكا داڭعىلى مەن اباي كوشەسىنىڭ قيىلىسىندا جينالىپ، رۇقسات ەتىلمەگەن ميتينگ وتكىزدى. الماتىدا وسىعان ۇقساس رۇقسات ەتىلمەگەن ميتينگ قازاقستان تاۋەلسىزدىگى مونۋمەنتىنىڭ جانىندا ءوتتى" دەلىنگەن مينيسترلىك تاراتقان حابارلامادا.

ۆەدومستۆونىڭ مالىمدەۋىنشە، زاڭسىز شارالارعا قاتىسقاندار مەرەكە كۇنى ازاماتتاردىڭ تىنىشتىعى مەن دەمالىسىن بۇزعان.

"جەرگىلىكتى اتقارۋشى ورگانداردىڭ ميتينگىلەر وتكىزۋ ءۇشىن زاڭدى نەگىزدەردىڭ جوقتىعى تۋرالى ەسكەرتۋلەرىنە قاراماستان، جينالعاندار نۇر-سۇلتان جانە الماتى قالاسى كوشەلەرىندەگى شەرۋدى جالعاستىردى. وسىلايشا، ولار مەرەكە كۇنى ازاماتتاردىڭ تىنىشتىعى مەن دەمالىسىن بۇزدى. قاتىسۋشىلار بيلىك ورگاندارىنىڭ زاڭسىز ارەكەتتەردى توقتاتۋ تۋرالى تالاپتارىن ورىنداماعاندىقتان، نۇر-سۇلتان قالاسىندا 32 ادام، الماتى قالاسىنا 23 ادام پوليسياعا جەتكىزىلدى. ولارمەن پروفيلاكتيكالىق اڭگىمەلەسۋ جۇرگىزىلەدى جانە اكىمشىلىك جاۋاپكەرشىلىككە تارتۋ ماسەلەسى قارالۋدا" دەپ حابارلادى ءىىم.

كەشە، 16 جەلتوقساندا قازاقستاننىڭ بىرنەشە قالاسىندا 1986 جىلعى جەلتوقسان وقيعاسى مەن 2011 جىلعى جاڭاوزەن وقيعالارىندا قۇربان بولعان ازاماتتاردى ەسكە الىپ، رۋحتارىنا قۇران باعىشتاعان. سول كۇنى تۇستەن كەيىن الماتى مەن نۇر-سۇلتاندا جينالعاندار قالا كوشەلەرىندە "شال، كەت!" دەگەن ۇرانمەن شەرۋلەتتى. پوليسيا شەرۋگە قاتىسقان ازاماتتاردى جاپپاي ۇستادى.