ايتىس شىمىلدىعىن باتىس قازاقستان وبلىسىنىڭ اكىمى عالي ەسقالييەۆ پەن «Nur Otan» پارتياسىنىڭ حاتشىسى عابيدوللا وسپانقۇلوۆ اشىپ بەردى.
«اق جايىقتا العاش وتكەلى تۇرعان «التىن دومبىرا» اقىندار ايتىسىنىڭ اشىلۋىمەن قۇتتىقتايمىن. تاريحى مول، تابيعاتى كوركەم اق جايىققا قوش كەلدىڭىزدەر. ايتىس - بابالار اماناتى. اقىندارعا شالقار تابىس تىلەيمىن»، - دەدى وبلىس اكىمى عالي ەسقالييەۆ. 
ودان كەيىن ءسوز العان «Nur Otan» پارتياسىنىڭ حاتشىسى عابيدوللا وسپانقۇلوۆ ەلىمىزدىڭ جەر-جەرىندە پارتيا قولداۋىمەن وتكىزىلىپ جاتقان ايتىستاردىڭ ماڭىزىنا توقتالدى.
«Nur Otan» پارتياسىنىڭ ءتوراعاسى نۇرسۇلتان نازاربايەۆ يۋنەسكو-نىڭ ماتەريالدىق ەمەس مادەني مۇرالار تىزىمىنە ەنگەن ايتىس ونەرىنە قولداۋ كورسەتۋدى تاپسىردى. تاۋەلسىزدىگىمىز ماڭگى بولىپ، ايتىستىڭ تۇعىرى بيىكتەي بەرسىن»،- دەدى عابيدوللا وسپانقۇلوۆ.
جىر دوداسىن اقىن، حالىقارالىق ايتىس اقىندارى مەن جىرشى-تەرمەشىلەر وداعىنىڭ ءتوراعاسى ءجۇرسىن ەرمان جۇرگىزدى. 
ايتا كەتەيىك، «Nur Otan» قولداۋىمەن سوڭعى 4 ايدىڭ ىشىندە اتىراۋ، قاراعاندى، قوستاناي، الماتى جانە نۇر-سۇلتان قالالارىندا ايتىستار وتكەن بولاتىن. تاۋەلسىزدىك كۇنىنە وراي ورال قالاسىندا ءوتىپ جاتقان بۇل «التىن دومبىرا» رەسپۋبليكالىق اقىندار ايتىسى بيىلعى جىلى «Nur Otan» پارتياسىنىڭ قولداۋىمەن ەلدىڭ وڭىرلەرىندە ۇيىمداستىرىلعان ايتىستاردى قورىتىندىلاماق.
پارتيا ايتىس وتكىزۋدى بيىلمەن عانا شەكتەمەي، بۇل ءۇردىس كەلەسى جىلى عۇلاما عالىم ءابۋ ناسىر ءال-فارابيدىڭ 1150 جىلدىعى مەن ابايدىڭ 175 جىلدىعىنا وراي وتكىزىلەتىن الامان ايتىستارعا ۇلاسپاق.
وسىمەن سەگىزىنشى رەت ۇيىمداستىرىلىپ وتىرعان «التىن دومبىرا» ايتىسىنا جىل بويى وتكەن دودالاردا جەڭىمپاز بولعان 20 اقىن قاتىسۋدا. ولاردىڭ قاتارىندا جانداربەك بۇلعاقوۆ، اسەم ەرەجە قىزى، بەكزات اسقاروۆ، ارۋنا كەرىمبەك، رۇستەم قايىرتاي، شۇعايىپ سەزىمحان، قانات مىرزاحان، حازىرەت بەردىحان، مۇحتار نيازوۆ، ايبەك قالييەۆ اسپانبەك شۇعاتايەۆ، شالقارباي ءىزباساروۆ، ديدار قامييەۆ، ءومىرجان كوپبوسىنوۆ، سەرىك قۇسانبايەۆ، جۇلدىزاي ماراتبەك قىزى، ءبىرجان بايتۋوۆ، جانسايا مۋسينا، تالعات مىقي، باۋىرجان شيرمەدين ۇلى سىندى ايتىسكەرلەر بار. 
پىكىر قالدىرۋ