قازاقستان پرەزيدەنتى قاسىم-جومارت-توقايەۆ ەلدىڭ رەسەيدەگى توتەنشە جانە وكىلەتتى ەلشىسى يمانعالي تاسماعامبەتوۆ قىزمەتىنەن بوساتۋ تۋرالى جارلىققا قول قويدى. توقايەۆتىڭ جارلىعى بۇگىن، 18 جەلتوقساندا اقوردا سايتىندا جاريالاندى.
توقايەۆتىڭ جارلىعىندا تاسماعامبەتوۆتىڭ قىزمەتىنەن بوساتىلۋىن زەينەت جاسىنا تولۋىمەن بايلانىستىرعان.
"مەملەكەت باسشىسىنىڭ جارلىعىمەن يمانعالي نۇرعالي ۇلى تاسماعامبەتوۆ زەينەتكەرلىك جاسقا تولۋىنا بايلانىستى قازاقستان رەسپۋبليكاسىنىڭ رەسەي فەدەراسياسىنداعى توتەنشە جانە وكىلەتتى ەلشىسى قىزمەتىنەن بوساتىلدى" دەلىنگەن توقايەۆتىڭ جارلىعىندا.
تاسماعامبەتوۆتىڭ ورنىنا قازاقستاننىڭ رەسەيدەگى توتەنشە جانە وكىلەتتى ەلشىسى بولىپ ءالى ەشكىم تاعايىندالمادى.
تاسماعامبەتوۆ وسى جىلدىڭ 9 جەلتوقسانىندا زەينەت جاسى - 63-كە تولعان. ول قازاقستان تاۋەلسىزدىك العان جىلدان بەرى جوعارى بيلىكتەگى لاۋازىمدى قىزمەتتەردى اتقاردى. ول قازاقستاندى 30 جىلعا جۋىق باسقارعان نۇرسۇلتان نازاربايەۆتىڭ جارلىعىمەن ءۇش رەت پرەمەر-مينيستردىڭ ورىنباسارى بولىپ تاعايىندالعان، ءبىر رەت قازاقستاننىڭ پرەمەر-مينيسترى بولعان. سونىمەن قاتار تاسماعانبەتوۆ نۇر-سۇلتان جانە الماتى قالالارىن، اتىراۋ وبلىسىن باسقارعان. پرەزيدەنت اكىمشىلىگىندە باسشى بولىپ، مەملەكەتتىك حاتشى قىزمەتىن دە اتقارعان. ەكى جىل قورعانىس مينيسترلىگىن باسقارعان. 2017 جىلدان بەرى ەلشىلىك قىزمەتتە بولدى.
2006 جىلى تاسماعامبەتوۆ الماتى قالاسىندا اكىم بولعان تۇرعان كەزدە "شاڭىراق" وقيعاسى ورىن الدى.
وقي وتىرىڭىز:
♦ ساياسي ەليتا سەركەلەرىمەن قوش ايتىسۋ تەحنولوگياسى تاسماعامبەتوۆكە دە قولدانىلا ما؟
پىكىر قالدىرۋ