بوت جانە فەيك اككاۋنت ەكى ءتۇرلى بولعانمەن دە، ءوزارا تىعىز بايلانىستا جۇمىس اتقاراتىن جالعان اككاۋنتتار. ولار شىنايى اككاۋنتتار سەكىلدى وزگەلەردىڭ جازبالارىنا ءلۇپىل باسىپ، پىكىر جازىپ، رەپوست جاسايدى. بوت جانە اككاۋنتتاردىڭ فەيك ەكەندىگىن انىقتاۋ ءۇشىن ءتۇرلى تاسىلدەردى پايدالانۋعا بولادى. سولاردىڭ ەڭ ماڭىزدىلارىن اتاپ وتسەك:

1. الەۋمەتتىك جەلىدەگى بەلسەندىلىگىن تەكسەرۋ. ياعني، پاراقشاداعى فوتو، ۆيدەولاردىڭ قاشان جۇكتەلگەنىن، سۋرەتتەردىڭ استىندا نەشە پىكىر، ءلۇپىل بار ەكەنىن، العاشقى فوتو مەن سوڭعى فوتونىڭ قاشان سالىنعانىن سالىستىرۋ ارقىلى بىلۋگە بولادى.

2. قولدانۋشىنىڭ جەكە باسىنا بايلانىستى اقپاراتتىڭ، تىركەلۋشىلەردىڭ سانىن باقىلاۋ ارقىلى. ەگەر ولاردىڭ سانى از بولسا، كوبىندە، بوت نە فەيك اككاۋنت بولىپ شىعادى.

3. پاراقشاداعى كەز كەلگەن فوتونىڭ تۇسىنا ءتىنتۋىردىڭ سول جاق باتىرماسىن باسىپ، «كوپيراۆات URL كارتينكي» دەگەندى تاڭداڭىز. جاڭا تەرەزەگە «كارتينكي» دەپ ىزدەپ، سيفرلى فوتواپپارات بەلگىسىن باسىپ، فوتونىڭ سىلتەمەسىن نەمەسە ءوزىن جۇكتەسەڭىز، ىزدەۋ ناتيجەسىندە ۇقساس كارتينكالار ءتىزىمىنىڭ اراسىنان ءدال سول فوتونىڭ قاي الەۋمەتتىك جەلىدەن العانىن، جيىنتىقتىڭ ىشىندە بار ما ەكەندىگىن تەكسەرىپ كورە الاسىز . ەگەر بوت پەن اككاۋنتتىڭ فەيك ەكەنىنە كۇمانىڭىز قالماسا، الەۋمەتتىك جەلى ادمينىنە حابارلاپ، ولاردى بۇعاتتاتا الاسىز.

وتكەن جىلعى قويىلعان "ءازىل الەمى" كونسەرتىندە تۇرسىنبەك قاباتوۆ ءوزىنىڭ ەشبىر الەۋمەتتىك جەلىدە تىركەلمەگەنىن، الدەبىرەۋلەردىڭ ونىڭ ەسىمىن پايدالانىپ، پاراقشا اشىپ، شىر-پىر بولۋىنا نە سەبەپ دەپ تاڭدانىسىن اشىق ايتقان-دى. قازىرگى ساتتە ينستاگراممدا kabatov_tursynbek_resmi دەپ اتالاتىن پاراقشاسى بار. ال ونىڭ اتىن قولدانىپ، جۇمىس ىستەپ وتىرعان باسقا وننان استام پاراقشا "ەسىم ۇرلاۋشىلاردىڭ" قولىندا. شىنىندا، فەيك اككاۋنت اشۋ ولارعا نە ءۇشىن كەرەك؟

كوپشىلىك قاراپايىم ادامدار بەلگىلى تۇلعالاردىڭ ەسىمىن پايدالانۋ ارقىلى وزدەرىنىڭ جازبالارىن جۇرتشىلىقتىڭ كوپتەپ وقىپ، وقىرمان اۋديتورياسىنىڭ نەعۇرلىم اۋقىمدى بولعانىن ارماندايدى. ەندى بىرەۋلەرى جارناما جاساپ، رەيتينگ جيناپ، مول تابىسقا كەنەلۋ ءۇشىن فەيك اككاۋنت اشادى. جالعان قايىرىمدىلىق اكسيالارىن ۇيىمداستىرىپ، ولجانى وڭاي يەلەنۋگە نيەتتەنگەندەر دە تابىلادى.

2018 جىلى بەلگىسىز بىرەۋ ازاتتىق راديوسىنىڭ ءتىلشىسى ءسانيا تويكەننىڭ اتىنان تەلەگرامم جەلىسىندە پاراقشا جۇرگىزىپ، جۇرتشىلىقتى ميتينگكە شىعۋعا ۇندەگەن. ارتىنان رەپورتەر بۇل دەرەك بويىنشا سوتقا شاعىم بىلدىرگەن. قورعاۋشى عالىم نۇرپەيىسوۆ سول كەزدە فەيك اككاۋنتتىڭ يەسىنىڭ 2 جىلدان 17 جىلعا دەيىن باس بوستاندىعىنان ايىرىلۋى مۇمكىن ەكەنىن ايتتى.

"قوستاناي تاڭى" گازەتىنىڭ حابارلاۋىنشا، بيىل 20 جاستاعى قاپشاعاي تۇرعىنى ينستاگراممدا bakyt_best اككاۋنتىمەن تىركەلىپ، تاۋارلاردى ساتامىن دەپ قاراجات جيناۋمەن اينالىسقان. قۇرىعىنا ىلىككەن قوستاناي تۇرعىنى ونىڭ ەسەپشوتىنا 12 800 تەڭگە اۋدارىپ جىبەرگەن. ايىپتالۋشى ق ر قىلمىستىق كودەكسىنىڭ 190-بابىنا سايكەس قىلمىستىق جاۋاپكەرشىلىككە تارتىلدى.

سوڭعى ۋاقىتتا بەلگىلى اكتەر دميتريي ناگييەۆتىڭ ءجۇرىس-تۇرىسىن، سويلەۋ مانەرىن سالىپ، الەۋمەتتىك جەلىلەردە بىرنەشە بايقاۋلار ۇيىمداستىرىپ جۇرگەندەر بار. ولار وقىرماندارعا قۇندى سىيلىق پەن اقشالاي جۇلدەلەر بەرۋگە ۋادە ەتكەن. الاياقتاردىڭ سوزىنە يلانعان جەلى قولدانۋشىلارى بايقاۋدىڭ شارتىن ورىنداپ، قالتاسىنان قاعىلعان. جابىق كيىنىپ ۆيدەوعا تۇسكەندىكتەن، ولاردى بىردەن تانۋ مۇمكىن ەمەس.

بۇنداي دەرەكتەر از ەمەس.

بوتتى داۋىس جيناۋ ءۇشىن عانا قولدانبايدى، ونىمەن قوسا، بىرنەشە فۋنكسيالاردى ىسكە اسىرۋ ءۇشىن پايدالانادى. كوپتەگەن بوتتار بىرىگىپ جۇمىس جاسايدى. بوتتار كومپانيا سايتىنىڭ تۇتىنۋشىلارىنىڭ ساۋالىنا جاۋاپ بەرەدى، اۋا-رايىن مالىمدەيدى، جالعان جاڭالىقتارمەن ەل ءىشىن دۇرلىكتىرەدى. كوبىنەسە، جارنامانى تاراتۋمەن اينالىسادى. كەي مەملەكەتتەردە جالعان اقپاراتتى ساياسي جاعدايدى ءبىر جۇيەگە كەلتىرۋ ءۇشىن، اۋديتوريانىڭ نازارىن اۋدارتۋ ءۇشىن تاراتادى. مىسالى، دونالد ترامپ پرەزيدەنت بولعاندا، نارازىلىق اكسياسى قاپتاپ كەتتى. امەريكاداعى ساياسي ءدۇمپۋدى باسۋ ءۇشىن ادەيى فەيك جاڭالىقتار ەل ىشىندە جاريالاعان ەدى.

سوڭعى ۋاقىتتا ماماندار اقپاراتتىڭ جالعاندىعىن تەكسەرۋدىڭ جاڭا ءادىسىن ويلاپ تاپتى. ەڭ الدىمەن، اقپاراتتىڭ سەنساسيا تۋدىرۋ ءۇشىن جازىلعانىنا نازار اۋدارىڭىز. ەگەر سەنساسياعا نەگىزدەلسە، لەپ بەلىگىسى مەن سۇراۋ بەلگىسىنىڭ قانشالىقتى ءجيى كەزدەسەتىنىنە ءمان بەرىڭىز. ەگەر ساۋاتتىلىق دەڭگەيى تومەن بولسا، فەيك اقپارات بولۋى مۇمكىن. URL ادرەسىنە ءمان بەرىپ، سايتتاعى "ءبىز تۋرالى" قوسىمشاسىن تۇگەل اقتارىپ شىعىڭىز.

سامال قوجامجاروۆا