قازاقستان ۇكىمەتىنىڭ قاۋلىسىمەن تيمۋر توقتابايەۆ باسقا جۇمىسقا اۋىسۋىنا بايلانىستى يندۋستريا جانە ينفراقۇرىلىمدىق دامۋ ۆيسە-مينيسترى لاۋازىمىنان بوساتىلدى. بۇل تۋرالى بۇگىن، 18 جەلتوقساندا قازاقستان پرەمەر-مينيسترىنىڭ باسپا ءسوز قىزمەتى حابارلادى.
پرەمەر-مينيستردىڭ باسپا ءسوز قىزمەتى تاراتقان حابارلامادا توقتابايەۆتىڭ قانداي قىزمەتكە اۋىسقانى ايتىلماعان.
توقتابايەۆ 1981 جىلى دۇنيەگە كەلگەن، 2011 جىلدان باستاپ قازاقستاننىڭ يندۋستريا جانە ينفراقۇرىلىمدىق دامۋ مينيسترلىگىندە جۇمىس ىستەدى.
بۇگىن، 18 جەلتوقساندا پرەزيدەنت قاسىم-جومارت توقايەۆ ءبىرقاتار كادرلىق ءاۋىس-تۇيىس جاساعان ەدى. توقايەۆتىڭ جارلىعىمەن قانات بوزىمبايەۆ ەنەرگەتيكا ءمينيسترى قىزمەتىنەن بوساتىلىپ، پرەزيدەنت كومەكشىسى بولىپ تاعايىندالدى. ال شىلدە ايىنان بەرى پرەزيدەنت كومەكشىسى مىندەتىن اتقارعان ماۋلەن اشىمبايەۆ دارحان كالەتايەۆتىڭ ورنىنا پرەزيدەنت اكىمشىلىگى جەتەكشىسىنىڭ ءبىرىنشى ورىنباسارى بولىپ تاعايىندالدى. كالەتايەۆتىڭ قانداي قىزمەتكە تاعايىندالعانى ازىرگە بەلگىسىز. سونىمەن قاتار، ءمادينا ءابىلقاسىموۆا ۇلتتىق بانك ءتوراعاسىنىڭ ورىنباسارى قىزمەتىنەن بوساپ، قارجى نارىعىن رەتتەۋ جانە دامىتۋ اگەنتتىگىنىڭ ءتورايىمى بولىپ تاعايىندالدى. ول ناۋرىز ايىنان بەرى ۇلتتىق بانك ءتوراعاسىنىڭ ورىنباسارى بولعان. بۇعان قوسا، بۇگىن توقايەۆ تاعى ءبىر شەنەۋنىكتى قىزمەتىنەن بوساتتى. 2017 جىلدان بەرى قازاقستاننىڭ رەسەيدەگى ەلشىلىگىن باسقارىپ كەلە جاتقان يمانعالي تاسماعانبەتوۆ زەينەت جاسىنا تولۋىنا بايلانىستى توقايەۆتىڭ جارلىعىمەن قىزمەتىنەن كەتتى.
پىكىر قالدىرۋ