بۇگىن، 18 جەلتوقسان قازاقستان پرەزيدەنتى قاسىم-جومارت توقايەۆ قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆانى قابىلدادى. بۇل تۋرالى اقوردا سايتى حابارلادى.
ءمادينا ءابىلقاسىموۆا بۇگىن عانا توقايەۆتىڭ جارلىعىمەن ۇلتتىق بانك ءتوراعاسىنىڭ ورىنباسارى قىزمەتىنەن بوساپ، جاڭادان قۇرىلعان قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى بولىپ تاعايىندالعان ەدى.
اقوردانىڭ جازۋىنشا، كەزدەسۋ بارىسىندا توقايەۆ ءابىلقاسىموۆاعا "بانك جۇيەسىن تۇراقتاندىرۋدى جانە قارجى سەكتورىن دامىتۋدى قامتاماسىز ەتۋگە قاتىستى ءبىرقاتار ناقتى تاپسىرما" بەرگەن.
اقوردا سايتىندا ءابىلقاسىموۆا باسشىلىق ەتەتىن جاڭا اگەنتتىك الماتى قالاسىندا ورنالاساتىنى ايتىلعان.
ءمادينا ءابىلقاسىموۆا 2019 جىلى ءۇش رەت قىزمەت اۋىستىردى. 40 جاستاعى ءابىلقاسىموۆا وسى جىلدىڭ اقپانىندا ەلدىڭ سول كەزدەگى ەل پرەزيدەنتى نۇرسۇلتان نازاربايەۆ تاراتىپ جىبەرگەن باقىتجان ساعىنتايەۆ ۇكىمەتىمەن بىرگە وتستاۆكاعا كەتكەن. ءابىلقاسىموۆا ول كەزدە ەڭبەك جانە حالىقتى الەۋمەتتىك قورعاۋ مينيسترلىگىن باسقارىپ تۇرعان.
جاڭا مينيسترلەر كابينەتى جاساقتاعاندا ءابىلقاسىموۆا ۇلتتىق ەكونوميكا ۆيسە-مينيسترى رەتىندە ۇكىمەتكە قايتا ورالدى. ءبىراق ول بۇل قىزمەتتى 16 كۇن عانا اتقاردى. نازاربايەۆ مەرزىمەن بۇرىن پرەزيدەنتتىك وكىلەتىگىن توقتاتقان سوڭ ورنىنا كەلگەن ۋاقشا پرەزيدەن قاسىم-جومارت توقايەۆ ءابىلقاسىموۆانى ۇلتتىق بانك ءتوراعاسىنىڭ ورىنباسارى ەتىپ تاعايىنداعان.
ءابىلقاسىموۆا 1999 جىلدان بەرى ۇكىمەت قۇرىلىمىندا جۇمىس ىستەيدى. بۇرىندارى پرەمەر كانسەليارياسى ءبولىمى باسشىسىنىڭ ورىنباسارى، ەكونوميكالىق دامۋ جانە ساۋدا ۆيسە-مينيسترى، ەكونوميكا مەن بيۋدجەتتى جوسپارلاۋ ۆيسە-مينيسترى بولىپ ىستەگەن.
ءمادينا ءابىلقاسىموۆا – بۇرىن پارلامەنت ءماجىلىسىنىڭ دەپۋتاتى بولعان ەراسىل ءابىلقاسىموۆتىڭ قىزى. 2005 جىلى ءابىلقاسىموۆ قازاقستان پرەزيدەنتتىگىنە كانديدات بولىپ، سايلاۋدا بارلىق داۋىستىڭ 0،34 پايىزىن جيناعان.
پىكىر قالدىرۋ