قازاقستان پرەزيدەنتى قاسىم-جومارت توقايەۆتىڭ جارلىعىمەن ماحامبەت دوسمۇحامبەتوۆ اتىراۋ وبلىسىنىڭ اكىمى بولىپ تاعايىندالدى. توقايەۆتىڭ جارلىعى بۇگىن، 18 جەلتوقساندا اقوردا سايتىندا جاريالاندى.
بۇعان دەيىن اتىراۋ وبلىسى اكىمى مىندەتىن اتقارعان نۇرلان نوعايەۆ ەنەرگەتيكا ءمينيسترى بولىپ تاعايىندالدى.
59 جاستاعى ماحامبەت دوسمۇحامبەتوۆ بۇعان دەيىن ەنەرگەتيكا ءمينيسترىنىڭ ورىنباسارى قىزمەتىن اتقارىپ كەلگەن. ول - اتىراۋ وبلىسىنىڭ تۋماسى.
بۇگىن، 18 جەلتوقساندا پرەزيدەنت قاسىم-جومارت توقايەۆ بيلىكتە ءبىرقاتار كادرلىق وزگەرىستەر جاساعان ەدى. توقايەۆتىڭ جارلىعىمەن قانات بوزىمبايەۆ ەنەرگەتيكا ءمينيسترى قىزمەتىنەن بوساتىلىپ، پرەزيدەنت كومەكشىسى بولىپ تاعايىندالدى. ال شىلدە ايىنان بەرى پرەزيدەنت كومەكشىسى مىندەتىن اتقارعان ماۋلەن اشىمبايەۆ دارحان كالەتايەۆتىڭ ورنىنا پرەزيدەنت اكىمشىلىگى جەتەكشىسىنىڭ ءبىرىنشى ورىنباسارى بولىپ تاعايىندالدى. كالەتايەۆتىڭ قانداي قىزمەتكە تاعايىندالعانى ازىرگە بەلگىسىز. سونىمەن قاتار، ءمادينا ءابىلقاسىموۆا ۇلتتىق بانك ءتوراعاسىنىڭ ورىنباسارى قىزمەتىنەن بوساپ، جاعادان قۇرىلعان قارجى نارىعىن رەتتەۋ جانە دامىتۋ اگەنتتىگىنىڭ ءتورايىمى بولىپ تاعايىندالدى. ول ناۋرىز ايىنان بەرى ۇلتتىق بانك ءتوراعاسىنىڭ ورىنباسارى بولعان. بۇعان قوسا، بۇگىن توقايەۆ 2017 جىلدان بەرى قازاقستاننىڭ رەسەيدەگى ەلشىلىگىن باسقارىپ كەلە جاتقان يمانعالي تاسماعامبەتوۆ زەينەت جاسىنا تولۋىنا بايلانىستى قىزمەتىنەن بوساتتى.
