توقايەۆتىڭ ۇلتتىق كەڭەسىندە كوتەرىلگەن ماسەلەلەردەن ەشقانداي وزگەرىس بولمايدى. العاشقى كەزدە ايتقانداي-اق، بۇل بولماشى عانا «كوسمەتيكالىق» وزگەرىستەر.

بىرىنشىدەن، ميتينگىلەردى رۇقسات الۋدان ەسكەرتۋ فورماسىنا اۋىستىرۋ بويىنشا. بۇل تەك قانا جالپىلاما ۇسىنىس. ءالى پارلامەنتتىڭ قاراۋىنا بارادى. ول زاڭ تۇرىندە قابىلدانىپ، بەكىتكەنشە، ونىڭ ىشىنە تالاي قۇيتىرقىلىقتاردى ەنگىزەتىنىنە كۇمانىم جوق. مىسالى، الماتى قالاسىندا ميتينگى وتكىزۋگە ەكىنشى جەر رەتىندە گاندي پاركىن ۇسىنىپ جاتىر. نەگە ميتينگى وتكىزۋ ءبىر جەرگە بايلانۋى ءتيىس؟ بەيبىت جيىندى كەز كەلگەن جەردە، تەك قانا ستراتەگيالىق ماڭىزى بار اسكەري نىسانداردىڭ جانىندا وتاكىزۋگە بولمايدى دەپ جازىلۋى كەرەك قوي. ودان كەيىن ميتينگىلەر تۋرالى جاڭا زاڭدا — ۇيىمداستىرۋشىلار ماتەريالدىق مىندەتتەمە الۋى كەرەك دەگەن ماسەلە كوتەرىلگەن. ياعني، ميتينگىنى وتكىزەسىز، ارتىنشا سول ماڭايدا ورنالاسقان كافەلەر، مەيرامحانالار، كوممۋنالدىق قىزمەتتەر سىزگە قارسى ميلليونداعان ايىپپۇلدار سالعىزادى. ءسىزدىڭ كەسىرىڭىزدەن «جۇمىسىمىز توقتادى، شىعىن كەلدى جانە ت.ب». رەسەيدە وسى پرينسيپ قاتتى جۇمىس ىستەيدى. سوڭعى ماسەلە — الەكسەي ناۆالنىيعا ميتينگى وتكەن ماڭايداعى رەستوران يەسى بىرنەشە ميلليون ايىپپۇل سالدىرعان. كورەسىزدەر، وسىعان ۇقساس شەكتەۋدى بۇل زاڭعا دا كىرگىزەدى.

ەكىنشىدەن، ساياسي پارتيالاردى تىركەۋ تۋرالى. 40 مىڭنان 20 مىڭعا ءتۇسىردى دەپ بورىكتى اسپانعا اتاتىنداي ەمەس. 40 مىڭنان 1 مىڭعا تۇسىرسە، تۇسىنىكتى بولار ەدى. پارتيا تىركەۋدەگى نەگىزگى ماسەلە — قول جيناۋدا عانا ەمەس. ونىڭ باسقا دا بيۋروكراتيالىق توسقاۋىلدارى كوپ — باستاماشىل توپ قۇرۋ، قول جينالىپ بولعان سوڭ ادىلەت مينيسترلىگىنىڭ جاۋاپ بەرۋ مەرزىمىن ناقتىلاۋ جانە ت.س.س. ال بۇل تۋرالى ءبىر ءسوز جوق.

ۇشىنشىدەن، سايلاۋ تۋرالى، ب ا ق تۋرالى، ساياسي تۇتقىندار تۋرالى ءبىر اۋىز ءسوز ايتىلمادى.
دەمەك، ۇلتتىق كەڭەس جۇمىسىنىڭ ناتيجەسى — كوزبوياۋشىلىق، نولگە تەڭ دەۋگە بولادى. ونىڭ قۇرامىندا مەن ءوزىم سىيلايتىن تۇلعالار بار. بۇل كەڭەس جۇمىسىنىڭ ناتيجەسىز بولۋى، ارينە، 100 پايىز ولارعا بايلانىستى ەمەس، ماسەلە — ساياسي جۇيەدە. بۇگىنگى جيىننىڭ قورىتىندىسى — ەلدە ەشقانداي كۇردەلى ساياسي رەفورمالار نازاربايەۆتىڭ تۇسىندا بولمايدى دەگەن ءسوز.

جانبولات مامايدىڭ facebook پاراقشاسىنان الىنعان