ىشكى ىستەر ءمينيسترىنىڭ ءبىرىنشى ورىنباسارى مارات قوجايەۆ اليمەنت تولەۋدەن جالتارىپ جۇرگەن اكەلەرگە قولدانىلاتىن شارالاردى قاتاڭداتۋدى ۇسىندى، دەپ حابارلايدى Qamshy.kz اقپارات اگەنتتىگى.

بۇگىندە اليمەنت تولەمەيتىن ازاماتتاردى ىزدەۋ پوليسيا بولىمدەرىنىڭ قۇزىرەتتىلىگىندە. ولار اليمەنتشىنىڭ تۇرعىلىقتى جەرى بويىنشا ىزدەيدى. 2018 جىلى 1864 اليمەنتشىگە ىزدەۋ سالىنىپ، 78ء-ى تابىلعان. ياعني 9 پايىزى عانا. قالعاندارىن ىزدەۋ توقتاتىلعان.

مارات قوجايەۆتىڭ سوزىنشە، اليمەنت ءىسى ازاماتتىق-قۇقىقتىق قاتىناس نەگىزىندە قارالاتىندىقتان، قارىزدان جالتارۋشىلاردى ىزدەۋدە قىلمىسكەردى ىزدەگەندەگىدەي تاسىلدەر قولدانىلمايدى.

"سايكەسىنشە قولدانىستاعى مەحانيزم اليمەنتشىنى مىندەتىن ورىنداۋعا ماجبۇرلەي المايدى. سوندىقتان اكىمشىلىك كودەكسكە اليمەنتشىگە جاۋاپكەرشىلىك جۇكتەيتىن، قاجەتىنە قاراي قاماۋعا، ماسەلەن 5 كۇنگە قاماۋعا مۇمكىندىك بەرەتىن وزگەرىستەر ەنگىزۋ قاجەت"، دەيدى ىشكى ىستەر ءمينيسترىنىڭ ءبىرىنشى ورىنباسارى.

وسى رەتتە ماسەلەنىڭ شەشىمدەرىنىڭ ءبىرى رەتىندە ادىلەت مينيسترلىگى يتاليا تاجىريبەسىن زەردەلەپ جاتقانىن حابارلادى. وعان ساي، بەرەشەگى بار ازاماتتىڭ قارىزى ونىڭ اكە-شەشەسىنە مىندەتتەلەدى.

قازاقستاندا ازاماتتىق قۇقىق بۇزۋشىلىقتىڭ 35 پايىزى اليمەنت ءىسى بويىنشا قوزعالادى. ورتا ەسەپپەن جىلىنا 200 مىڭ ءىس قارالادى. 13 مىڭ ءىس پروبلەمالىق بولىپ تانىلعان. ول ىستەر بويىنشا بەرەشەك سوماسى 5،7 ملرد تەڭگەنى قۇرايدى.