2019 جىلدىڭ 19 جەلتوقسانىندا ق ر سىبايلاس جەمقورلىققا قارسى قىزمەتى اتىراۋ وبلىستىق مەملەكەتتىك كىرىستەر دەپارتامەنتى باسشىسىنا قاتىستى قىلمىستىق ءىس قوزعالعانى جايىندا اقپاراتتىق حابارلاما تاراتقان.
الايدا ق ر سىبايلاس جەمقورلىققا قارسى ءىس-قيمىل اگەنتتىگىنىڭ دەپارتامەنتى بۇل اقپاراتتى جوققا شىعاردى دەپ جازادى Qamshy.kz اقپارات اگەنتتىگى zakon.kz سايتىنىڭ دەرەگىن نەگىزگە الىپ.
ق ر سىبايلاس جەمقورلىققا قارسى ءىس-قيمىل اگەنتتىگى اتىراۋ وبلىستىق مەملەكەتتىك كىرىستەر دەپارتامەنتى باسشىسىنا قاتىستى جەمقورلىق قالمىسىن جاسادى دەگەن كۇدىكپەن سوتقا دەيىنگى تەرگەۋدى باستادى. ول وبلىستىق مكد-نىڭ جاناما سالىقتار جونىندەگى باسقارماسى باسشىسىنان قىزمەتتە وسىرۋگە، جالپى قولداۋ كورسەتۋ ۋادەسى ءۇشىن تالاپ ەتكەن 10 مىڭ دوللار پارانىڭ 3 مىڭ دوللارىن العان دەگەن كۇدىككە ءىلىندى – دەلىنگەن اگەنتتىكتىڭ 19 جەلتوقسانداعى حابارلاماسىندا.
ق ر سىبايلاس جەمقورلىققا قارسى ءىس-قيمىل اگەنتتىگىنىڭ اتىراۋ وبلىستىق دەپارتامەنتى نۇرعالي تاسماعامبەتوۆكە قاتىستى ەشقانداي قىلمىستىق ءىستى تىركەمەگەنىن مالىمدەدى.
- دەپارتامەنتتە جولدانعان ساۋالدا اتى اتالعان تۇلعالارعا قاتىستى سوتقا دەيىنگى تەرگەۋ تىركەلمەگەنىن، ولارعا قاتىستى تەرگەۋ ارەكەتتەرى جۇرگىزىلمەگەنىن حابارلايمىز، - دەلىنەدى دەپارتامەنت باسشىسىنىڭ ورىنباسارى ب.ۇزىنجاستىڭ قولى قويىلعان رەسمي جاۋاپتا.
پىكىر قالدىرۋ