الماتى وبلىسىندا 36 جاستاعى مايوردى ءۇيىنىڭ الدىندا باسىنان اتىپ كەتتى دەپ جازادى Qamshy.kz اقپارات اگەنتتىگى KTK ارناسىنىڭ دەرەگىن نەگىزگە الىپ. 

الماتى وبلىسىندا اسكەري بولىمشە باسشىسىنىڭ ورىنباسارىن اتىپ كەتتى. 36 جاستاعى مايوردىڭ دەنەسى ءوزى تۇراتىن ءۇيدىڭ الدىنان تابىلعان. رۇستەم جانىقبايەۆ تالدىقورعانداعى №48386 اسكەري بولىمشەدە قىزمەت ەتكەن. سوندىقتان مارقۇمنىڭ اكەسى بۇل قاستاندىق ونىڭ قىزمەتىنە تىكەلەي قاتىستى بولۋى مۇمكىن دەيدى. الايدا مايوردى مەرت قىلعانداردىڭ كىم ەكەنى ازىرگە بەلگىسىز. ءتارتىپ ساقشىلارى اسكەريگە وق اتقانداردى ىزدەۋگە كىرىستى.

رۇستەم جانىقبايەۆتىڭ ءولى دەنەسى ءوزى تۇراتىن ءۇيدىڭ الدىنان كەشە كەشقۇرىم تابىلعان. تالدىقورعانداعى قاراتال ىقشاماۋدانىنداعى اۋلادا جاتقان مارقۇمدى كۋاگەرلەر كورىپ، جەدەل-جاردەم شاقىرتقان ەكەن. الايدا دارىگەرلەر كەلگەنشە 36 جاستاعى مايور جان تاپسىرعان. ونى بەلگىسىز بىرەۋلەر اڭشى مىلتىعىمەن باسىنان اتىپتى.  

"بالامدى ارتىنان كەلىپ اتىپ كەتىپتى. جەلكەسىنە قارۋ تاقاپ كەلىپ، «رۇستەم» دەگەندە جالت قاراعان. سول ساتتە بەتىنەن اتقان. نە ءۇشىن ءولتىردى؟ بىلمەيمىن. كىمگە جامانشىلىق جاسادى؟ قارا جامىلعان وتباسى مارقۇمنىڭ ەشكىمگە «جامانشىلىعى جوق ەدى"، دەيدى مارقۇمنىڭ اكەسى سەيىتحان جانىقبايەۆ.

اسىرەسە قايعىدان قان جۇتقان اكەسى ۇلىنىڭ تىك مىنەزدى بولعانىن، ءبىراق جان بالاسىمەن جاۋلاسپاعانىن ايتادى. دەسە دە بۇل قاستاندىقتىڭ قىزمەتىنە تىكەلەي قاتىسى بولۋى مۇمكىن ەكەنىن جوققا شىعارمايدى. ال پوليسەيلەر كەشەلى بەرى كۇدىكتىلەردى ىزدەستىرىپ جاتىر. جاقىن ماڭداعى بەينەكامەرالار تەكسەرىلىپ، قاندى قىلمىستى كورگەن كۋاگەرلەر ىزدەستىرىلۋدە. الايدا ازىرگە ەشقانداي ىلىك جوق.   

"اتالعان دەرەككە قاتىستى جەدەل ىزدەستىرۋ توبى قۇرىلدى. توپتىڭ قۇرامىنا تاجىريبەلى ماماندار جۇمىلدىرىلدى. ءقازىر قىلمىسقا قاتىسى بار تۇلعالاردى انىقتاۋعا باعىتتالعان كەڭاۋقىمدى ىزدەستىرۋ جۇمىستارى جۇرگىزىلىپ جاتىر"، - دەدى الماتى وبلىستىق پد رەسمي وكىلى سەرىك ۇرپييەۆ. 

قاسكويلەردىڭ قولىنان قازا تاپقان مايوردىڭ ارتىندا ەكى بالاسى قالدى. ال ءوزى قىزمەت ەتكەن اسكەري ءبولىم باسشىلارى بۇل جاعدايعا قاتىستى قانداي دا ءبىر پىكىر بىلدىرۋگە قۇلىقسىز. ەلىمىزدىڭ قورعانىس مينيسترلىگى دە تەرگەۋ قۇپيالىلىعىنا بايلانىستى بولجام ايتۋدان باس تارتىپ وتىر. ال وبلىستىق پوليسيا دەپارتامەنتى ادام ءولتىرۋ بابى بويىنشا قىلمىستىق ءىس قوزعاپ، اسكەري ءبولىم قىزمەتكەرىنىڭ ءولىمىن ىشكى ىستەر ءمينيسترى ءوز باقىلاۋىنا الدى.