قازاقستان پرەزيدەنتى قاسىم-جومارت توقايەۆ 28 جەلتوقساندى جالپىۇلتتىق ازا تۇتۋ كۇنى دەپ جاريالادى. بۇل تۋرالى پرەزيدەنتتىڭ باسپا ءسوز حاتشىسى بەرىك ءۋالي مالىمدەدى. 

"پرەزيدەنت قاسىم-جومارت توقايەۆ الماتى ماڭىندا ۇشاق اپاتىنان ادامداردىڭ قازا بولۋىنا بايلانىستى 2019 جىلدىڭ 28 جەلتوقسانىن جالپىۇلتتىق ازا تۇتۋ كۇنى دەپ جاريالادى"، دەپ جازدى بەرىك ءۋالي Facebook-تاعى پاراقشاسىندا. 

جۇما كۇنى تاڭعى ۋاقىتتا الماتىدان نۇر-سۇلتان قالاسىنا ۇشىپ شىققان ۇشاق راداردان جوعالىپ كەتكەنى حابارلانعان. اۋەجاي باسپا ءسوز قىزمەتىنىڭ مالىمەتىنشە،  الماتىدان نۇر-سۇلتان قالاسىنا 2100 رەيسىمەن 07:05-تە ۇشىپ،  راداردان جوعالىپ كەتكەن «Bek Air» اۋە كومپانياسىنىڭ ۇشاعىنىڭ بورتىندا 95 جولاۋشى جانە 5 ەكيپاج مۇشەسى بولعان. سوڭعى اقپارات بويىنشا، قازا تاپقاندار سانى 15-كە جەتكەن. ولاردىڭ 14ء-ى اپات بولعان ورىندا قازا تاپسا، بىرەۋى اۋرۋحانادا كوز جۇمعان.