قازاقستان پرەمەر-مينيسترىنىڭ ورىنباسارى رومان سكليار الماتىداعى ۇشاق اپاتىنان قازا بولعاندار سانى 15 ەمەس، 12 ادام ەكەنىن ايتتى. بۇل تۋرالى ول الماتى اۋەجايىندا وتكەن باسپا ءسوز جيىنىندا مالىمدەدى.

– اپات سالدارىنا بارلىعى 12 ادام قازا تاپتى. ولاردىڭ سەگىزى وقيعا ورىنىندا قازا تاپسا، ەكەۋى اۋرۋحانادا، تاعى ەكى ادام الماتى اۋەجايىندا كوز جۇمدى. الماتى وبلىسى مەن قالاسىنىڭ اۋرۋحانالارىنا بارلىعى 49 ادام جەتكىزىلدى. ولاردىڭ 18 اۋىر حالدە، – دەدى سكليار.

بۇعان دەيىن باق-تا قازا تاپقاندار سانى 15-كە جەتكەنى حابارلانعان. پرەمەر-مينيستردىڭ ورىنباسارى بۇل اقپاراتتى جوققا شىعاردى. 

سكليار ۇشاقتىڭ اپاتقا ۇشىراۋ سەبەبىنىڭ العاشقى نۇسقالارىن تۋرالى دا ايتتى. 

– ۇشار كەزدە اۋە كەمەسى ەكى رەت ۇشۋ-قونۋ جولاعىنا سوقتىققان. ۇشۋ-قونۋ جولاعى اياقتالعاننان كەيىن اۋە كەمەسى وڭعا بۇرىلعان. شاسسي (ۇشاق دوڭگەلى – رەد.) بۇل ۋاقىتتا جيناقتالىپ قويعان. ۇشاق ۇشىپ كەتپەك بولعانىمەن وڭ جاققا اۋىپ كەتىپ، جەكە ءۇيدىڭ قورشاۋىنا سوعىلعان. ۇيدە ەشكىم بولماعان. ۇشاق سوقتىعىس سالدارىنان ەكىگە ءبولىنىپ كەتكەن. بۇل ۇشقىشتىڭ كىناسىنەن بولدى ما، الدە تەحنيكالىق اقاۋدان با، انىقتالۋ ۇستىندە. نەگىزىنەن ۇشاقتىڭ الدىڭعى جاعىندا وتىرعان جولاۋشىلار كوز جۇمعان. قازا تاپقانداردىڭ وتباسى مەن زارداپ شەككەندەرگە ماتەريالدىق كومەك كورسەتىلەدى، – دەدى  سكليار.                                                 

بۇگىن،  27 جەلتوقسان كۇنى تاڭەرتەڭ الماتى اۋەجايى ماڭىنا Bek Air اۋە كومپانياسىنىڭ Fokker-100 ۇشاعى قۇلادى. ۇشاقتا 93 جولاۋشى مەن بەس ەكيپاج مۇشەسى بولعان. جولاۋشىلار اراسىندا ۋكراينانىڭ ەكى ازاماتى، قىرعىزستاننىڭ ءبىر ازاماتى، قىتايدىڭ ءبىر ازاماتى بار.

قوعامدىق دەنساۋلىق ساقتاۋ باسقارماسىنىڭ مالىمەتىنشە، بارلىعى 66 ادام اۋرۋحاناعا جەتكىزىلگەن، 50 ادام اۋرۋحاناعا جاتقىزىلعان. دارىگەرلەر ولاردىڭ كەيبىرنىڭ جاعدايى اۋىر ەكەنىن ايتتى. 

قازاقستان پرەزيدەنتى قاسىم-جومارت توقايەۆ  الماتىداعى ۇشاق اپاتىنا بايلانىستى 28 جەلتوقساندى جالپىۇلتتىق ازا تۇتۋ كۇنى ەتىپ جاريالادى.