قازاقستان پرەزيدەنتى قاسىم-جومارت توقايەۆ ۇكىمەتكە الماتى قالاسى مەن الماتى وبلىسى اكىمدىكتەرىمەن بىرلەسىپ قازا بولعان ازاماتتاردىڭ وتباسىلارىنا 4 ميلليون تەڭگە كولەمىندە ماتەريالدىق كومەك كورسەتۋدى تاپسىردى. بۇل تۋرالى اقوردانىڭ رەسمي سايتى حابارلادى.
اقوردانىڭ جازۋىنشا، توقايەۆ مۇنداي تاپسىرمانى ۇشاق اپاتىنا بايلانىستى اقوردادا وتكىزگەن شۇعىل كەڭەستە بەرگەن.
سونىمەن قاتار توقايەۆ قايتىس بولعانداردىڭ جاقىندارىنا جان-جاقتى پسيحولوگيالىق جانە مەديسينالىق قولداۋ كورسەتىلەتىنىن ايتقان.
بۇعان دەيىن توقايەۆ الماتىداعى ۇشاق اپتىنا بايلانىستى 28 جەلتوقساندى جالپىۇلتتىق ازا تۇتۋ كۇنى دەپ جاريالاعان بولاتىن. پرەزيدەنت شۇعىل كەڭەستە سوعان بايلانىستى ەرتەڭ ەلدەگى مەملەكەتتىك تۋلاردى تومەن تۇسىرۋگە جانە بارلىق ويىن-ساۋىق شارالارىن توقتاتۋعا تاپسىرما بەردى.
بۇگىن، 27 جەلتوقسان كۇنى تاڭەرتەڭ الماتى اۋەجايى ماڭىنا Bek Air اۋە كومپانياسىنىڭ Fokker-100 ۇشاعى قۇلادى. الماتى اۋەجايى باسپا ءسوز قىزمەتىنىڭ حابارلاۋىنشا، ۇشاقتا 93 جولاۋشى مەن بەس ەكيپاج مۇشەسى بولعان. رەسمي ورىنداردىڭ دەرەگىن نەگىزگە العان ءبىرقاتار ب ا ق باستاپقىدا 15 ادامنىڭ قازا تاپقانىن حابارلاعان ەدى. كەيىنىرەك پرەمەر-مينيستردىڭ ورىنباسارى رومان سكليار ۇشاق اپاتىنان 12 ادامنىڭ قازا بولعانىن مالىمدەدى. ولاردىڭ اراسىندا ەكيپاج كومانديرى مارات مۇراتوۆ تا بار.
پىكىر قالدىرۋ