قازاقستان پرەزيدەنتى قاسىم-جومارت توقايەۆ اقوردادا الماتىداعى ۇشاق اپاتىنا بايلانىستى شۇعىل كەڭەس وتكىزدى. بۇل تۋرالى اقوردانىڭ رەسمي سايتى حابارلادى. 

اقوردانىڭ حابارلاۋىنشا، جيىنعا پرەمەر-مينيستر اسقار مامين، پرەزيدەنت اكىمشىلىگىنىڭ جەتەكشىسى ەرلان قوشانوۆ، باس پروكۋرور عيزات نۇردالەتوۆ، ۇلتتىق قاۋىپسىزدىك كوميتەتى ءتوراعاسى كارىم ءماسىموۆ، ىشكى ىستەر ءمينيسترى ەرلان تۇرعىمبايەۆ، اقپارات جانە قوعامدىق دامۋ ءمينيسترى دارەن ابايەۆ، دەنساۋلىق ساقتاۋ ءمينيسترى ەلجان ءبىرتانوۆ قاتىسقان. ال قاۋىپسىزدىك كەڭەسىنىڭ ءتوراعاسى نۇرسۇلتان نازاربايەۆ شۇعىل كەڭەسكە قاتىسقان جوق. ونىڭ ورنىنا قاۋىپسىزدىك كەڭەسىنىڭ حاتشىسى قالمۇحامەت قاسىموۆ توقايەۆ وتكىزگەن شۇعىل جيىنعا قاتىستى.

جيىندا توقايەۆ قازاقستان حالقىنىڭ جانە جەكە ءوزىنىڭ اتىنان قازا بولعان ازاماتتاردىڭ وتباسىلارى مەن جاقىندارىنا كوڭىل ايتىپ، پرەمەر-مينيستر اسقار ءماميننىڭ، باس پروكۋرور عيزات نۇرداۋلەتوۆتىڭ، ىشكى ىستەر ءمينيسترى ەرلان تۇرعىمبايەۆتىڭ جانە دەنساۋلىق ساقتاۋ ءمينيسترى ەلجان ءبىرتانوۆتىڭ ەسەپتەرىن تىڭداعان.

اقوردا تاراتقان حابارلامادا توقايەۆتىڭ قازا بولعان ازاماتتاردىڭ وتباسىلارىنا 4 ميلليون تەڭگە كولەمىندە ماتەريالدىق كومەك كورسەتۋدى تاپسىرعانى جازىلعان.

"قايتىس بولعانداردىڭ جاقىندارىنا جان-جاقتى پسيحولوگيالىق جانە مەديسينالىق قولداۋ كورسەتىلەدى. سونىمەن قاتار زارداپ شەككەندەردىڭ بارلىعىنا قاجەتتى كومەك بەرىلەدى. 28 جەلتوقساندى جالپىۇلتتىق ازا تۇتۋ كۇنى دەپ جاريالاعان پرەزيدەنت ەلىمىزدەگى مەملەكەتتىك تۋلاردى تومەن تۇسىرۋگە جانە بارلىق ويىن-ساۋىق شارالارىن توقتاتۋعا تاپسىرما بەردى" - دەلىنگەن اقورلدا تاراتقان حابارلامادا.

اقوردانىڭ جازۋىنشا، توقايەۆ كەڭەس بارىسىندا ۇشاق اپاتىنا سوقتىرعان سەبەپتەردى ساپالى ءارى وبەكتيۆتى تۇردە تەكسەرۋگە، "قازاقستاننىڭ اۆياسيالىق اكىمشىلىگى" اكسيونەرلىك قوعامىن بىلىكتى ماماندارمەن قامتۋ جۇمىستارىن تولىق اياقتاۋ شارالارىن قابىلداۋعا، قاۋىپسىزدىك تالاپتارىنا سايكەستەندىرۋ ءۇشىن بارلىق اۋە كومپانيالارىنىڭ جۇمىستارى مەن اۆياسيالىق ينفراقۇرىلىم نىساندارىن تەكسەرۋگە تاپسىرما بەرگەن.

بۇعان قوسا، توقايەۆ باس پروكۋراتۋرا مەن ىشكى ىستەر مينيسترلىگىنە قوزعالعان قىلمىستىق ءىس اياسىندا ۇشاق اپاتىنا سوقتىرعان سەبەپتەردى انىقتاۋ، كىنالىلەردى زاڭعا سايكەس جاۋاپكەرشىلىككە تارتۋ، سونداي-اق، الماتى اۋەجايىنىڭ اۋماعىنا جاقىن ورنالاسقان جەكە قۇرىلىستاردىڭ زاڭدىلىعىن زەرتتەۋ جونىندە شارا قابىلداۋدى تاپسىردى.

بۇگىن، 27 جەلتوقسان كۇنى تاڭەرتەڭ الماتى اۋەجايى ماڭىنا Bek Air اۋە كومپانياسىنىڭ Fokker-100 ۇشاعى قۇلادى. الماتى اۋەجايى باسپا ءسوز قىزمەتىنىڭ حابارلاۋىنشا، ۇشاقتا 93 جولاۋشى مەن بەس ەكيپاج مۇشەسى بولعان. رەسمي ورىنداردىڭ دەرەگىن نەگىزگە العان ءبىرقاتار ب ا ق باستاپقىدا 15 ادامنىڭ قازا تاپقانىن حابارلاعان ەدى. كەيىنىرەك پرەمەر-مينيستردىڭ ورىنباسارى رومان سكليار ۇشاق اپاتىنان 12 ادامنىڭ قازا بولعانىن مالىمدەدى. ولاردىڭ اراسىندا ەكيپاج كومانديرى مارات مۇراتوۆ تا بار.