اقتاۋدا 70 جاستاعى ايەل ادام 2-قاباتتان قۇلاپ قايتىس بولدى. بۇل تۋرالى ماڭعىستاۋ وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتى حابارلادى. 

دەنساۋلىق ساقتاۋ باسقارماسىنىڭ حابارلاۋىنشا، 2-قاباتتان قۇلاعان ايەل ادامدى 5-شاعىناۋدان، 39ء-ۇيدىڭ ارتىندا قانسىراپ جاتقان جەرىنەن تۇرعىندار كورىپ، تاڭەرتەڭگى ساعات 8.40 شاماسىندا جەدەل جاردەمگە حابار بەرگەن.

"دارىگەرلەر سول جەردە ايەل ادامنىڭ سول جاق بىلەك سۇيەگىندە جابىق سىنىق، ۇرشىق سۇيەگىنىڭ سول جانە وڭ جاعىنا زاقىم كەلگەنىن انىقتادى. شۇعىل تۇردە ماڭعىستاۋ وبلىستىق اۋرۋحاناسىننىڭ قابىلداۋ بولمەسىنە جەتكىزىلدى. وكىنىشكە قاراي، ساعات 9:45 شاماسىندا ەسىن جيماي، كوز جۇمدى" - دەيدى وبلىستىق دەنساۋلىق ساقتاۋ باسقارماسىنىڭ باسپا ءسوز حاتشىسى نۇربول وكۋوۆ. 

ال وبلىستىق پوليسيا دەپارتامەنتى باسپا ءسوز قىزمەتىنىڭ مالىمەتىنشە، ازىرگە بۇل ءىس تەرگەلۋدە.

"اتالعان دەرەك قىلمىستىق كودەكسىنىڭ 105-بابىنا سايكەس سوتقا دەيىنگى ءبىرىڭعاي تىزىلىمگە تىركەلدى. سوتقا دەيىنگى تەرگەۋ امالدارى ءجۇرىپ جاتىر. سوت-مەديسينالىق ساراپتاما تاعايىندالدى" - دەيدى وبلىستىق پوليسيا باسقارماسى باسپا ءسوز قىزمەتىنىڭ باسشىسى ايگەرىم يباتۋللايەۆا.