سىبايلاس جەمقورلىققا قارسى كۇرەس قىزمەتى ۇلتتىق قاۋىپسىزدىك كوميتەتى قىزمەتكەرلەرىمەن بىرىگىپ، پاۆلودار وبلىسى اكىمدىگىن تىندىگەن. تەرگەۋ امالدارى وبلىس اكىمىنىڭ ورىنباسارى ارىستان قابيكەنوۆتىڭ كابينەتىندە دە جۇرگىزىلگەن، دەپ جازادى ratel.kz سايتى.
وبلىس اكىمىنىڭ باسپا ءسوز حاتشىسى ەرنار سەيتاحمەت وبلىس باسشىسىمەن بىرگە كۇنى بويى ەكىباستۇز قالاسىندا بولىپ، جولدان كەشكە قاراي كەلگەندىكتەن، قولىندا الدەكىمدەردىڭ ۇستالعانى تۋرالى دەرەكتىڭ جوعىن ايتتى. "ۇزىنقۇلاقتان" جەتكەن اڭگىمە سەنسەك، باكاۋوۆ ەكىباستۇزعا جەتىپ ۇلگەرمەگەن نەمەسە جەتكەنىمەن، جينالىس ۇستىندە كومەكشىسىمەن بىرگە دەرەۋ پاۆلودارعا قايتقان.
كابينەتى ءتىنتىلدى دەلىنگەن اكىم ورىنباسارى ارىستان قابيكەنوۆ اكىمشىلىكتە ينۆەستيسيالىق جوبالارعا جاۋاپتى بولعان. قولدا بار دەرەككە ساي، ول الدەبىر ينۆەستوردان پارا العان. قابيكەنوۆ اتالعان قىزمەتكە 2019 جىلعى 15 ناۋرىزدا تاعايىندالعان. وعان دەيىن ينۆەستيسيا جانە دامۋ بويىنشا ۆيسە-مينيستر، پرەمەر-مينيستر كەڭسەسى باسشىسىنىڭ ورىنباسارى، قازاقستاننىڭ جاپونياداعى ەلشىلىگىندە ينۆەستيسيا بويىنشا كەڭەسشى قىزمەتتەرىن اتقارعان.
كەي دەرەككوزدەردىڭ اقپاراتىنا ساي، وبلىستاعى جوعارى لاۋازىمدى شەنەۋنىكتەردەن قۇقىق قورعاۋ ورگاندارىنىڭ نىساناسىنا ىلىككەن جالعىز قابيكەنوۆ ەمەس.
ال وبلىس باسشىسى بولات باكاۋوۆ تۋرالى ازىرگە ناقتى اقپارات جوق. الايدا ول 23:00 شاماسىندا ءوزىنىڭ ينستاگرامداعى پاراقشاسىنا وبلىستاعى باسقارمالاردىڭ ءبىرى وتكىزگەن القا وتىرىسقا قاتىسقانى جونىندە جازبا قالدىردى. وسى ارقىلى اكىم تەرگەۋدەن امان ەكەنىن بىلدىرگىسى كەلگەنگە ۇقسايدى.
پىكىر قالدىرۋ