اقىن اباي قۇنانباي ۇلىنىڭ 175 جىلدىق مەرەيتويىنا ارنالعان ءىس شارالارعا جۇمسالاتىن قاراجات سومماسى بەلگىلى بولدى. بۇل تۋرالى بۇگىن، 16 قاڭتاردا نۇر-سۇلتاندا وتكەن باسپا ءسوز جيىنىندا مادەنيەت جانە سپورت ۆيسە-مينيسترى نۇرعيسا داۋەشوۆ مالىمدەدى. 

ونىڭ ايتۋىنشا، اقىننىڭ مەرەيتويىنا جۇمسالاتىن قاراجات مادەنيەت جانە سپورت مينيسترلىگىنىڭ جىلدىق بيۋدجەتىنەن بولىنەدى.

– نەگىزى، بارلىعى جىلدىق جوسپار اياسىندا وتەدى. وسىلايشا، اباي بابامىزدىڭ 175 جىلدىعىنا ارنالعان بارلىق شارالارعا 3 ميلليارد تەڭگەگە تارتا اقشا جۇمسالادى. ول – جوسپارلى قاراجات. مىسالى، اباي اتىنداعى وپەرا تەاترىنىڭ گاسترولدىك ساپارلارىنا بولىنەتىن قارجى بولادى. ولار سول قارجىنى ابايدىڭ مەرەيتويىنا ارناپ، ماسكەۋ، تۇركيا مەن قىتايعا بارادى. باسقا ونەر ۇجىمدارى دا سولاي ىستەپ وتىر، – دەدى داۋەشوۆ.

ۆيسە-مينيستردىڭ سوزىنە قاراعاندا، بيۋدجەتتىڭ ىشىندە ابايدىڭ ءومىرى مەن شىعارماشىلىعىنا ارنالعان ءۇش دەرەكتى ءفيلمنىڭ قاراجاتى دا بار. بۇدان بولەك، پاريجدە يۋنەسكو اياسىندا ءبىرقاتار شارا ۇيىمداستىرىلادى.

مەرەيتوي اياسىندا ابايدىڭ «جيدەباي-بورىلى» مەملەكەتتىك تاريحي-مادەني جانە ادەبي-مەموريالدىق مۋزەي-قورىعىن تۇرلەندىرۋ جانە اقىن ەسىمىمەن بايلانىستى تاريحي-مادەني مۇرا وبەكتىلەرىنە عىلىمي-رەستاۆراسيالاۋ جۇمىستارىن جۇرگىزۋ قاراستىرىلعان.

– بۇل جۇمىستاردىڭ ءبارى "قازرەستاۆراسيا" ۇيىمىنا بولىنگەن قاراجات ەسەبىنەن ىستەلەدى. مىسالى، ابايدىڭ سەمەي قالاسىنداعى مۋزەيىنىڭ ىشكى جوندەۋ جۇمىستارىنا 30 ملن تەڭگە ءبولىندى، – دەدى ۆيسە-مينيستر.  

ۇلى اباي مەرەيتويىنىڭ رەسمي سالتاناتتى اشىلۋ ءراسىمى 21 قاڭتار كۇنى نۇر-سۇلتان قالاسىندا وتەدى.

2019 جىلى 30 مامىردا قازاقستان پرەزيدەنتى قاسىم-جومارت توقايەۆ 2020 جىلى اباي قۇنانباي ۇلىنىڭ 175 جىلدىق مەرەيتويىن اتاپ ءوتۋ تۋرالى جارلىققا قول قويدى. ال وسى جىلدىڭ 9 قاڭتارىندا  "ەگەمەن قازاقستان" گازەتىندە توقايەۆتىڭ "اباي جانە ءححى عاسىرداعى قازاقستان" اتتى ماقالاسى جاريالانعان بولاتىن. 

اباي (يبراھيم) قۇنانباي ۇلى – قازاق جازبا ادەبيەتىنىڭ نەگىزىن قالاۋشى ءارى كلاسسيگى. ول – جۇزدەگەن ولەڭ، پوەما مەن اۋدارمانىڭ، فيلوسوفيالىق تراكتاتتار ستيلىندە جازىلعان "قارا سوزدەردىڭ" اۆتورى. سونىمەن قاتار ونىڭ 10-نان اسا ءانى مەن كۇيى بار.