بۇلاي ايتۋىمىزعا قازاقستان رەسپۋبليكاسى پارلامەنتى ءماجىلىسىنىڭ رەسمي سايتىنداعى باس بەتتە باتتيىپ تۇرعان  "ءماجىلىس كوپتەگەن زاڭ جوبالارىن جۇمىسقا الدى" دەگەن تاقىرىپ سەبەپ بولىپ وتىر.

سەنىڭىز، سەنبەڭىز، "زاڭ جوبالارىن جۇمىسقا الدى" دەپ تۇر. ياعني،پالاتا سپيكەرى نۇرلان ءنىعماتۋليننىڭ توراعالىعىمەن وتكەن جاڭا جىلداعى العاشقى جالپى وتىرىستىڭ وزەگىن ورگەن اقپاراتتىڭ تاقىرىپتىق سيىق-سىقپىتى وسى.

بۇل تۋرالى ازاتتىق ءتىلشىسى نۇربەك ءتۇسىپحان دا فەيسبۋك جەلىسىندە جازعان بولاتىن. وندا ول: 
"قازاقستان رەسپۋبليكاسى پارلامەنتىنىڭ ءماجىلىسى"ءماجىلىس كوپتەگەن زاڭ جوبالارىن جۇمىسقا الدى" دەپ تۇر ەكەن. كەيبىرىن جۇمىسقا الماي، كەيبىرىن ارىز جازدىرىپ، شىعارىپ جىبەرگەن بولار"، – دەپ سىناعان ەدى.

ەڭ سوراقىسى، بۇنداي تىلدىك زاڭدىلىقتى تىكەسىنەن "مىجىپ" وتكەن ورەسكەل قاتەلىك  قىسقا اقپاراتتىڭ سوڭىن الا "قالقيىپ"  تاعى دا تۇر.  

"بۇگىنگى جالپى وتىرىستا ءماجىلىس 16 زاڭ جوباسىن جۇمىسقا الدى. ونىڭ ىشىندە، ەكولوگيالىق كودەكس، اسىل تۇقىمدى مال شارۋاشىلىعى، مادەنيەت ماسەلەلەرى بويىنشا، مەملەكەتتىك فەلدەگەرلىك بايلانىس تۋرالى باسقا دا وتە ماڭىزدى زاڭ جوبالارى قامتىلعان"، – دەيدى پارلامەنتى ءماجىلىسى اپپاراتىنىڭ باسپا ءسوز قىزمەتى دايىنداعان قىسقا-قايىرىم اقپاردا.