"نۇر وتان" پارتياسىنىڭ ءتوراعاسى نۇرسۇلتان نازاربايەۆتىڭ كەلىسىمىمەن «Jas Otan» جاستار قاناتىنىڭ ءتوراعاسى قىزمەتىنە ەلنۇر بەيسەنبايەۆ سايلاندى. جاستار قاناتى ورتالىق كەڭەسى مۇشەلەرىنىڭ قاتىسۋىمەن وتكەن جيىندا پارتيا ءتوراعاسىنىڭ ءبىرىنشى ورىنباسارى «Jas Otan» جاستار قاناتىنىڭ الدىندا جاڭا ماقساتتار مەن مىندەتتەر تۇرعانىن العا تارتتى.

«ەلىمىزدىڭ جارقىن بولاشاعى ءۇشىن جاسوتاندىقتار ۇزدىكسىز قىزمەت ەتۋى ءتيىس. ەلباسى، پارتيامىزدىڭ ءتوراعاسى نۇرسۇلتان نازاربايەۆ ماسليحاتتىڭ بارلىق دەڭگەيىندە جاس دەپۋتاتتار سانىن 20%-عا دەيىن كوبەيتۋ قاجەتتىگىن ايتتى. بۇل رەتتە «Jas Otan» جاستار قاناتىنىڭ ءرولى ەرەكشە. اتالعان تىزىمدە جاسوتاندىقتار العاشقىلاردىڭ ءبىرى بولىپ تۇرۋى قاجەت. قاسىم-جومارت توقايەۆتىڭ ۇسىنىسىمەن 2020 جىل «ۆولونتەر جىلى» بولىپ جاريالاندى. وسى ورايدا، «Jas Otan» ەلىمىزدەگى ەڭ ءىرى جاستار ۇيىمى رەتىندە، ۆولونتەرلىك قوزعالىستى ورلەتۋدە الدىڭعى قاتاردا تۇرۋى ءتيىس»، - دەدى باۋىرجان بايبەك.

سونداي-اق، ول ازىرلەنىپ جاتقان 2020-2025 جىلدارعا ارنالعان «جاستار-وتانعا!» باعدارلاماسىندا ءبىلىم الۋ، جۇمىسقا ورنالاسۋ، باسپانا سياقتى ت.ب. جاستار ءۇشىن وزەكتى ماسەلەلەر قامتىلاتىنىن جەتكىزدى. وسى ورايدا، بارشا قازاقستان جاستارىنا ارنالعان باعدارلامانىڭ جوباسىن ازىرلەۋ جۇمىستارىنا ءاربىر اۋىلدىڭ، اۋداننىڭ، قالانىڭ جاستارى اتسالىسۋى قاجەت ەكەنىن ەرەكشە اتاپ ءوتتى.

ەلنۇر بەيسەنبايەۆتىڭ جاستار ساياساتىندا تاجىريبەسى مول. ستۋدەنتتىك جىلدارى جاستار ۇيىمدارىنىڭ بەلسەندى مۇشەسى بولعان. ول مەملەكەتتىك قىزمەتتە جانە ۇكىمەتتىك ەمەس ۇيىمداردا دا جۇمىس ىستەدى.

وسىعان دەيىن «Jas Otan» جق ءتوراعاسى قىزمەتىن اتقارعان داۋلەت كارىبەك پرەزيدەنتتىك كادرلىق رەزەرۆ تىزىمىنە ەنىپ، ەندى ءوزىنىڭ جاستار ساياساتىنداعى مول تاجىريبەسىن مەملەكەتتىك قىزمەت سالاسىندا ىسكە اسىرادى.

جاستاردى جان-جاقتى قولداۋ ماقساتىندا جاستار جىلىنىڭ قورتىندىسى رەتىندە 300 بىلىكتى جاستاردان تۇراتىن پرەزيدەنتتىك كادرلىق رەزەرۆ جاساقتالدى. بۇل – ەلىمىزدەگى ءبىلىمدى جانە بىلىكتى جاستاردى قولداۋعا باعىتتالعان ماڭىزدى شەشىم. پارتيا مەن جاستار قاناتىنىڭ ماقساتى – باسەكەگە قابىلەتتى بولۋدى، قوعامعا پايدا كەلتىرۋدى ويلايتىن، وتان ءۇشىن جاۋاپكەرشىلىك الۋعا دايىن جاستارعا الەۋمەتتىك ليفت جاساۋ.
«ءاربىر جاستىڭ جەكە جەتىستىگى – تۇتاس وتانىمىزدىڭ تابىسى» دەگەن تۇڭعىش پرەزيدەنت، ەلباسى نۇرسۇلتان نازاربايەۆتىڭ جاستارعا ءاردايىم ايرىقشا كوڭىل بولەتىنىن بىلەسىزدەر. پرەزيدەنت قاسىم-جومارت توقايەۆتىڭ تاپسىرماسىمەن جاستار جىلى اياسىندا ەڭ كوپ جاستار شوعىرلانعان نۇر-سۇلتان، الماتى جانە شىمكەنت قالالارىندا جۇمىس ىستەيتىن جاستارعا 3 مىڭ پاتەر بەرىلدى. سونداي-اق، الداعى ءۇش جىل ىشىندە پاتەر سانى 9 مىڭعا ۇلعايىپ، باسقا ايماقتاردى دا قامتيتىن بولادى»، - دەدى باۋىرجان بايبەك.