اقپارات جانە قوعامدىق دامۋ ءمينيسترى داۋرەن ابايەۆ مەملەكەت باسشىسى قاسىم-جومارت توقايەۆتىڭ تاپسىرماسىنا وراي بيىل ءوتۋى ءتيىس 800-دەن استام فورۋم مەن سەميناردىڭ قىسقارعانىن ايتتى، دەپ حابارلايدى Qamshy.kz اقپارات اگەنتتىگى قازاقپاراتتىڭ دەرەگىن نەگىزگە الىپ.

داۋرەن ابايەۆ مينيسترلىكتىڭ كەڭەيتىلگەن القا وتىرىسىندا ب ا ق وكىلدەرىنىڭ ساۋالىنا جاۋاپ بەردى. 

"ءبىز ابايدىڭ 175 جىلدىعىن، ەل تاۋەلسىزدىگى كۇنىن اتاپ وتەمىز. ق ر پرەزيدەنتى قاسىم-جومارت توقايەۆ اتالعان فورۋمداردىڭ ىشكى مازمۇنى جايىندا ايتقان بولاتىن. ال بۇل باسقا ماسەلە. تاۋەلسىزدىك كۇنىنىڭ 30 جىلدىعى اياسىندا ءتۇرلى مەرزىمدەرى بار ۇسىنىستاردى جيناقتاپ جاتىرمىز. سىزدەر الدىن الا جۇمىستاردى بايقامايسىزدار. بۇل جوسپار قازىرگى ۋاقىتتا 89-90 تارماقتان تۇرادى، ال باستاپقىدا 900 تارماق بولاتىن. ءبىز 800-دەن استام ءتۇرلى ءىس-شارانى الىپ تاستادىق. بۇل جۇمىستاردىڭ بارلىعىن جۇرگىزدىك، فورۋمدار مەن سەمينارلار ايتارلىقتاي قىسقاردى"، – دەدى مينيستر. 

سونداي-اق، مينيستر اقپان ايىندا قازاقستان تاۋەلسىزدىگىنىڭ 30 جىلدىعىن مەرەكەلەۋگە ارنالعان تۇجىرىمداما مەن ءىس-شارالاردى بەكىتۋ جوسپارلانىپ وتىرعانىن اتاپ ايتتى.