ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ  2023 جىلى قازاقستاندىقتاردىڭ ەڭ تومەنگى جالاقىسى ەلدەگى ورتاشا جالاقىنىڭ 30%، ياعني 70 مىڭ تەڭگەدەن تومەن بولمايدى دەپ حابارلادى تengrinews.kz

– كەيتس يندەكسى دەگەن كورسەتكىش بار. بۇل ورتاشا جالاقىعا ەڭ تومەنگى ەڭبەكاقى مولشەرىنىڭ قاتىناسى. بىزدە ول 23 پايىز بولىپ تۇر، ءبىز كوپتەگەن ەلدەردەن قالىپ تۇرمىز. ءبىز 2023 جىلدىڭ باسىندا ەڭ تومەنگى جالاقى سول كەزدەگى ورتاشا جالاقىنىڭ 30 پايىزىنان كەم بولماۋى ءۇشىن قامدانىپ جاتىرمىز. ەگەر 2023 جىلى ورتاشا جالاقى 224 مىڭ تەڭگە بولسا، ەڭ تومەنگى جالاقى 70 مىڭ تەڭگەدەن كەم بولماۋى ءتيىس، – دەدى نۇرىمبەتوۆ.

مينيستر ەڭ تومەنگى جالاقىنى كوتەرۋ ماسەلەسى قارالاتىنىن ايتتى.

ءمينيستردىڭ ايتۋىنشا، ەلدە 1،2 ملن بيۋدجەتتىك قىزمەتكەر بار، ولاردىڭ جالاقىسى ءار ءتۇرلى وزگەرەدى.

– ال جەكە سەكتورعا قاتىستى ايتار بولساق، ونەركاسىپتە جۇمىس ۋاقىتىنىڭ جيىنتىق ەسەبى بار رازريادتى كوەففيسيەنتى بار. وندىرىستىك كاسىپورىنداردا مينيمالدى جالاقى – بۇل تاريفتىك مولشەرلەمەنىڭ ءبىرىنشى رازريادى. تاريفتىك مولشەرلەمەنىڭ ەكىنشى، ءۇشىنشى جانە تاعى باسقا رازريادتارى بار. جانە ولار رازرياد ارالىق كوەففيسيەنتكە بايلانىستى بولادى. سوندىقتان ەڭ تومەنگى جالاقىنى كوتەرۋ باسقا دارەجەلەردىڭ وسۋىنە ىقپال ەتىپ، بۇل جالپى ەلدەگى جالاقىنىڭ وسۋىنە الىپ كەلەدى، – دەدى ول.