– ءبىز بۇگىن عانا بارلىق بانكتەردىڭ قايتا قارجىلاندىرۋ باعدارلاماسىنا قاتىسۋدان باس تارتىپ جاتقانىن بىلدىك. ءبىز شوك بولدىق. سەبەبى بۇعان دەيىن 17 بانك باعدارلاماعا قوسىلدى دەلىنگەن ەدى. بانكتەر ۇلتتىق بانك ۇسىنىپ وتىرعان تۇسىنىكسىز شارتتاردى قابىلداي المايمىز دەيدى. ۇلتتىق بانك تە بىردە-بىر بانكتىڭ قول قويماعانىن راستادى. ەندى بيلىكتىڭ سوزىنە سەنبەيمىز. قوشانوۆ پەن توقايەۆتىڭ وزىمەن كەزدەستىرۋدى تالاپ ەتەمىز، – دەدى بەلسەندى قاناعات تاكەيەۆا.

ونىڭ ايتۋىنشا، 6 اقپاندا بورىشكەرلەر ۇلتتىق ەكونوميكا ۆيسە-مينيسترى، ادىلەت ۆيسە-مينيسترى، سوت اكتىلەرىن ورىنداۋ دەپارتامەنتى، جوعارعى سوت وكىلدەرىمەن كەزدەسكەن. ءبىراق بورىشكەرلەر ولاردىڭ "ماسەلەلەرىڭىزدى شەشەمىز" ۋادەلەرىنەن شارشاعانىن، ناقتى ارەكەت جاسالماي وتىرعانىن ايتتى.

– كەلەمىز – الداپ-سۋلاپ شىعارىپ سالادى. ەرتەڭ بانكتىڭ اكسيونەرلەرى كەلەدى دەيدى. بارساڭ – اكسيونەرلەر تۇرماق، تاس تا جوق. ولار ءتىپتى باعدارلاما بارىن دا بىلمەيدى. ولار حالىقتى وسىندا قيناپ قويىپ، قالاي تاماق ىشەدى؟ نەشە كۇن بولدى زارلاپ جۇرگەنىمىزگە؟ جاۋاپ تابا الماي جاتىرمىز، – دەدى بورىشكەرلەردىڭ ءبىرى ءاليا بايبولاتوۆا.

ەكىنشى نارازىلىق اكسياسىن نۇر-سۇلتان اۋەجايىنىڭ تازالىعىنا جاۋاپتى كلينينگ كومپانياسىنىڭ ءبىر توپ قىزمەتكەرى وتكىزدى. ولار اۋەجاي تەرمينالدارىنىڭ بىرىنە جينالىپ، نارازىلىق جاسادى.

كومپانيا جۇمىسشىلارىنىڭ ايتۋىنشا، باسشىلىق جۇمىسشىلاردى قاجەتتى قۇرالدارمەن قامتاماسىز ەتپەيدى. اۋەجايدا رەزەڭكە قولعاپ، شۇبەرەك، تازالاۋ قۇرالدارى جوق، رەزەڭكە قولعاپ پەن مەديسينالىق ماسكانى قىزمەتكەرلەر وزدەرى ساتىپ الادى. وزدەرىن قاجەتتى زاتتار مەن قۇرالدارمەن قامتاماسىز ەتۋدى تالاپ ەتكەن جۇمىسشىلار تالاپتارى ورىندالماعان جاعدايدا جۇمىسقا شىعۋدان باس تارتاتىنىن ايتتى.

– بىزدە جۇمىس ىستەيتەندەردىڭ باسىم بولىگى – جالعىزباستى انالار. ءبارىنىڭ نەسيەسى بار، پاتەر جالداپ تۇرادى. توعىز اي بۇرىن باسشىلىق اۋىسقان. وسى ۋاقىت بويى شىداپ كەلدىك. شۇبەرەك جوق، بەس اي بويى قولعاپسىز جۇمىس ىستەدىك. ويلاڭىزدارشى: حالىقارالىق اۋەجاي، اجەتحانالار تولى. تازالايتىن قۇرال جوق، سۇيىق سابىن جوق، پاكەت جوق، قوقىستاردى شۇبەرەكپەن ورايمىز. ءبىر ءسوز ايتساڭ – بىردەن جۇمىستان شىعارادى، – دەدى ۇلجان تەلعوجينا.

ەكى جۇمىسشى بىرنەشە كۇن بويى تاققان ماسكالارىن شەشىپ تاستاعانى ءۇشىن جاقىندا وزدەرىن جۇمىستان شىعارعانىن ايتتى. 112 مىڭ تەڭگە جالاقى الاتىنىن ايتقان ەدەن جۋۋشىلار جۇمىسقا قاجەتتى زاتتاردى ساتىپ الۋعا شاماسى جەتپەيتىنىن ايتتى.

–  ءبىر ماسكانى ەكى كۇن تاعامىز. ءبارى تەرلەيدى. قولعاپ جوق، تازالايتىن قۇرالدار جەتىسپەيدى، سۇيتەدى دە تاعى ەسكەرتۋ ايتادى. ءبىز قۇلمىز با نە؟ باسشىلىقتى اۋىستىرسىن، بىزگە مۇنداي نارسە كەرەك جوق، – دەدى ماقپال بولاتوۆا ەسىمدى جۇمىسشى.

نارازىلاردىڭ الدىنا اۋەجايدى ينفراقۇرىلىمدىق قامتاماسىز ەتۋ جونىندەگى باسقارما ءتوراعاسىنىڭ ورىنباسارى ارنابول باقىت شىقتى. ول ەدەن جۋۋشىلار ايتقان ماسەلەنى ءبىرىنشى رەت ەستىپ تۇرعانىن، بۇعان دەيىن ەشكىمنىڭ شاعىمدانباعانىن ايتتى.

–  ماسكا، تازالاۋ قۇرالدارى – بارلىعى قاجەت كەزدە بەرىلەدى. اۋەجاي ءبارىن تولىعىمەن قامتاماسىز ەتىپ جاتىر. مەن ءقازىر عانا وسىنداي ماسەلە بارىن ءبىلىپ وتىرمىن. جالاقى ۋاقىتىندا بەرىلىپ جاتىر. ونى ەكى رەت كوبەيتتىك، – دەيدى ارنابول باقىت.

– ماسكا تاعۋ دەگەن تالاپتى ءبىز ەمەس، دەنساۋلىق ساقتاۋ مينيسترلىگى قويعان. بىردە-بىر قىزمەتكەر جۇمىستان شىعارىلعان جوق. ەشقانداي داۋ بولعان جوق. ماعان ەشكىم شاعىمدانعان جوق. ەگەر شاعىم بولسا، ونى قاراستىرۋعا دايىنبىز. ءبىراق ەشكىم كەلگەن جوق قوي، – دەدى ول.

اۋەجايدىڭ كادر ءبولىمىنىڭ جەتەكشىسى ايگۇل شىڭعىسوۆا بىردە-بىر قىزمەتكەردى جۇمىستان شىعارماعانىن، جاقىن ارادا جۇمىسشىلاردى قاجەتتى قۇرالدارمەن قاماماسىز ەتەتىنىن ايتتى.

– وسى اپتادان باستاپ بارلىق قۇرالدارمەن قامتاماسىز ەتەمىز. جەتپەگەن زاتتارعا بايقاۋ جاريالادىق. ءبارىن ساتىپ الامىز جانە جۇمىسشىلارعا بەرىلەدى. ەشكىمدى جۇمىستان شىعارعان جوقپىز. ەشكىم كەلىسىم-شارتتى بۇزعان جوق. مەكەمەنىڭ ىشكى ماسەلەلەرىن ءوزىمىز شەشەمىز، – دەدى ايگۇل شىڭعىسوۆا.