بۇل تۋرالى Qamshy.kz اقپارات اگەنتتىگى قازتاگ  سايتىنا سىلتەمە جاساپ حابارلايدى.

ۇقك ءتوراعاسىنىڭ ورىنباسارى نۇرعالي بىلىسبەكوۆ قازتاگ تىلشىسىنە بەرگەن جاۋابىندا ولاردىڭ وسى ۋاقىتقا دەيىن شەكارانى زاڭسىز بۇزىپ وتكەنى ءۇشىن سوتتالعانىن، باسقا ەش جاۋاپقا تارتىلماعانىن جەتكىزگەن:

"ەگەر ولاردىڭ ەكسترەميستىك ىس-ارەكەتتەرگە قاتىسى بار بولىپ شىقسا، ءسوز جوق، ءبىز ماسەلەنى حالىقارالىق زاڭ مەن كونۆەنسياعا  سايكەس، زاڭمەن بەكىتىلگەن ءتارتىپ اياسىندا شەشەمىز. ەگەر ولاردىڭ قىلمىستىق ىسكە قاتىسى راستالماسا، ماسەلە باسقاشا قارالادى. شەكارانى بۇزىپ كەلگەن ەكى قازاق (قاستەر مۇساحان ۇلى مەن مۇراگەر ءالىم ۇلى – رەد.) شەكارانى زاڭسىز بۇزىپ وتكەنى ءۇشىن عانا سوتتالدى ەمەس پە؟ باسقا ەش جاۋاپقا تارتىلىپ جاتقان جوق"،  – دەگەن نۇرعالي بىلىسبەكوۆ.

ءيا، ۇقك وكىلى دالمە-دال "حالىقارالىق زاڭ مەن كونۆەنسياعا سايكەس" دەيدى. حالىقارالىق زاڭ تۇسىنىكتى دەڭىز، ال كونۆەنسيا دەگەن نە دەسەڭىز، ونى دا تۇسىندىرە كەتەيىك.

ۇقك ءتوراعاسىنىڭ ورىنباسارى تىلگە تيەك ەتكەن كونۆەنسيا 1951 جىلى جەنيەۆادا قابىلدانعان، قازاقستاندا 1998 جىلى راتيفيكاسيالانعان. ياعني، بوسقىن مارتەبەسى جونىندەگى حالىقارالىق كونۆەنسياعا نازار اۋدارساڭىز، ومىرىنە ءقاۋىپ تونگەن كەز كەلگەن ازاماتقا ەش قيىندىقسىز بوسقىن ستاتۋسى بەرىلۋى ءتيىس. 

"بوسقىن مارتەبەسى" دەمەكشى، جوعارىداعى ادام قۇقىقتارى جونىندەگى حالىقارالىق قاعيداعا ساي، بوسقىن مارتەبەسى بەرىلۋى ءتيىس قاستەر مۇساقان ۇلى مەن مۇراگەر ءالىم ۇلى وسى ۋاقىتقا دەيىپ سوتتالىپ ۇلگەرگەن ەدى. ناقتىراق ايتقاندا، 21 قاڭتاردا ساياسي تاريحي وتانىنان پانا ىزدەپ، قىتايدان قاشىپ وتكەن قاستەر مۇساقان ۇلى مەن مۇراگەر ءالىمۇلىنا شىعىس قازاقستان وبلىسىندا ۇكىم شىعارىلىپ، ءبىر جىلعا باس بوستاندىعىنان ايىرۋ جازاسىنا كەسكەن.

وسىلايشا، "شەكارانى زاڭسىز كەسىپ ءوتتى" دەگەن ايىپپەن ۇستاعان ۇقك ەندى ولاردىڭ ەكسترەميستىك ىس-ارەكەتتەرگە قاتىسى بار-جوعىن انىقتاۋى مۇمكىن.