قىتايدا 600-دەن استام ادام كوروناۆيرۋس قۇربانى بولدى. قىتايدا ۆيرۋس جۇقتىرعانداردىڭ سانى 28000-نان اسقان. بۇل قىتايدىڭ دەنساۋلىق ساقتاۋ جونىندەگى مەملەكەتتىك كوميتەتىنىڭ بۇگىنگى مالىمەتتەرى، دەپ حابارلايدى  Qamshy.kz  اقپارات اگەنتتىگى  almaty.tv   -گە سىلتەمە جاساپ.

دۇنيەجۇزىلىك بۇقارالىق اقپارات قۇرالدارى بۇل ىندەتتى العاشقىلاردىڭ ءبىرى بولىپ ەسكەرتكەن جۇڭگو دارىگەرىنىڭ قايتىس بولعانى تۋرالى حابارلادى. جۇڭگو دارىگەرى لي ۆەنليان ۆيرۋستىڭ تارالعانىن العاشقى بولىپ ەسكەرتكەن ەدى، الايدا ارادا ءبىر اپتا وتكەندە دارىگەردىڭ ءوزى ءقاۋىپتى ىندەتتى جۇقتىرىپ العان.

34 جاستاعى دارىگەر جەتى ادامنىڭ ۆيرۋستى جۇقتىرىپ العانىن بىلگەننەن كەيىن، ءوز دوستارىن ساقتاندىرماقشى بولىپ، ولارعا الدىن الا ساقتىق شارالارىن ەسكەرتەدى. دەگەنمەن 12 قاڭتار كۇنى دارىگەردە ۆيرۋستىڭ بەلگىلەرى بايقالادى. دارىگەردەن الىنعان ساراپتاما ناتيجەسى 1 اقپان كۇنى انىقتالىپ، كوروناۆيرۋستى جۇقتىرعانىن كورسەتەدى.

قازىرگى تاڭدا قىتايدا  10 ميلليون ادام كارانتين جاريالانعان ايماقتا. سونىمەن قاتار، ۇلىبريتانيا، رەسەي جانە اقش-تى قوسقاندا 20-دان استام ەلدە ۆيرۋستىڭ تارالعانى تۋرالى مالىمەت بار.

قازاقستاندا كوروناۆيرۋس جۇقتىرعان ناۋقاستار تىركەلمەگەن. ەلىمىز قىتايمەن بايلانىستىڭ بارلىق ءتۇرىن توقتاتتى، اۆتوستانسيالار مەن اۋەجايلاردا سانيتارلىق باقىلاۋ كۇشەيتىلدى. دۇنيەجۇزىلىك دەنساۋلىق ساقتاۋ ۇيىمى بۇل ىندەتتى جاھاندىق ءقاۋىپ دەپ تانىدى جانە ونى حالىقارالىق دەڭگەيدە توتەنشە جاعداي دەپ جاريالادى.