الەۋمەتتىك جەلىدە "قوردايداعى توبەلەستىڭ" ۆيدەولارى تاراپ، قىزۋ تالقىلانىپ جاتىر دەپ جازادى Qamshy.kz اقپارات اگەنتتىگى.
ۆيدەودان ايعايلاپ، جىلاپ جاتقان ادامداردىڭ داۋسىن جانە مىلتىقتىڭ گۇرسىلىن ەستۋگە بولادى. جامبىل وبلىسى پوليسيا دەپارتامەنتىنىڭ باسپا ءسوز قىزمەتى قورداي اۋدانى ماسانشى اۋىلىندا تۇرعىندار اراسىندا جاپپاي توبەلەس بولعانىن راستادى.
پوليسيا دەپارتامەنتىنىڭ حابارلاۋىنشا، ماسانشى مەن قورداي اۋدانى تۇرعىندارىنىڭ اراسىندا تۇسىنبەۋشىلىك توبەلەسكە سەبەپ بولعان.
قازاقستانداعى دۇنگەندەر قاۋىمداستىعىنىڭ ءتوراعاسى حۋسەي داۋروۆتىڭ حابارلاۋىنشا، اتىس قورداي اۋدانىنداعى ماسانشى اۋىلىندا باستالىپ، جاعداي ۋشىعىپ بارا جاتىر، دەپ جازعان kaztag.kz سايتى.
"پوليسيا جاعدايدى باقىلاۋعا الدىق دەگەنىمەن، ماسانچيدەگى جاعداي باقىلاۋدا ەمەس، ءبىراق ودان سايىن ناشارلاپ بارادى. كەلگەن جىگىتتەر ماسانشى اۋىلىنداعى 10-نان استام ءۇيدى ورتەپ جىبەردى. ەندى اتىس باستالدى. ءتىپتى ءبىر توپ جىگىتتەر كەز كەلگەن ادامعا وق جاۋدىرىپ، ۇرىپ جاتىر. پوليسيا ەشتەڭە ىستەي الماۋدا. ادامدار قاۋىپسىزدىك كۇشتەرىنىڭ كەلۋىن كۇتۋدە، ءبىراق ازىرگە جاعداي وتە ناشار"، - دەدى داۋروۆ.
قازاقستان دۇنگەندەر قاۋىمداستىعىنىڭ جەتەكشىسىنىڭ ءوزى ماسانشى كەنتىنىڭ جانىندا ورنالاسقان سورتوبە اۋىلىندا تۇرادى.
"ءقازىر 10-نان استام اۋلالار ورتەنىپ جاتىر، ءورت ءسوندىرۋ ماشينالارى دا كورىنبەيدى. جاپپاي توبەلەس بولىپ جاتىر. تەك توبەلەس ەمەس، باسقا اۋىلداردان كەلگەن توپتار جەرگىلىكتى تۇرعىندارعا وق جاۋدىرۋدا"، - دەدى قازاقستانداعى دۇنگەندەر قاۋىمداستىعىنىڭ باسشىسى.
دەگەنمەن الەۋمەتتىك جەلىدە جامبىل وبلىسى قورداي اۋدانىندا دۇنگەن ۇلتىنىڭ ازاماتتارى "80 جاستاعى قازاق قاريا مەن ونىڭ ەكى بالاسىن ارماتۋرامەن، بالعامەن ۇرىپ، باسىن جارعانى" تۋرالى اقپارات تاراعان. جامبىل وبلىسىنداعى پوليسيا دەپورتامەنتى قوردايداعى جانجالعا بايلانىستى تەرگەۋ جۇمىستارى باستالعانىن حابارلادى.
پىكىر قالدىرۋ