ءبىز عوي ەلىمىزدە ءجۇرىپ جاتقان جۇيە مەن جۇيەسىزدىك جايىندا حاباردارمىز. سوندىقتان اتقا مىنگەن ازاماتتاردىڭ اۋزىنان شىققان ءاربىر ءسوزدىڭ استارىندا نە بار ەكەنىن اقىرىنداپ باجايلاي الامىز. ءبىراق ءبىزدىڭ ەلگە ءبىر شەتەلدىك جۋرناليست كەلىپ، كاسىپكەرلەر مەن اكىمدەردەن سۇحبات الا قالسا، نە ويلايتىنىن بىلەسىز بە؟ ەڭ الدىمەن بۇل ەلدە ەلباسىنان باسقادا باس جوق ەكەن دەپ ويلايدى. راسىمەن دە سولاي. قايدا بارماڭىز، كىممەن سويلەسپەڭىز «ەلباسىمىزدىڭ جولداۋىنا وراي، پرەزيدەنتىمىزدىڭ ۇسىنىسى بويىنشا، نۇرسۇلتان ءابىش ۇلىنىڭ باستاماسىمەن » دەپ باستالاتىن العى سوزدەرىن الدىڭىزعا توسەنىش ەتەدى. ءتىپتى ءسوزدىڭ سولاي باستالعاندىعىنا ەتىمىز ۇيرەنىپ كەتكەنى سونشالىق، ءبىر وتىرىستا وسى فرازا ايتىلماي قالسا، جۇرەگىمىز الاس ۇرىپ، ەكى ۇداي كۇي كەشەتىن بولعانبىز. وزدىگىنەن تىرلىگىن دوڭگەلەتىپ، كاسىپ اشپاق بولعان ادامدى تاۋىپ الىپ، «ءسىز وسى باستاماعا قالاي كەلدىڭىز، سونى ءسوز ەتسەڭىز»،- دەسەڭ بولدى بالەگە قالدىم دەي بەرىڭىز. تاۋدىڭ تۇكپىرىندەگى اۋىلداعى تويحانا اشقان كاسىپكەر دە وسى ءسوزدى ورتاعا قىستىرماسا، ماعان كەلىڭىز. اكىمدەردى تۇسىنۋگە بولادى. ولار سولاي سويلەمەگەندە، كىم سويلەسىن؟ كاسىپكەرلەرگە نە جوق؟ ە، كاسىپكەرلەردى دە تۇسىنۋگە بولادى. تاسىڭ ورگە دومالاسىن دەسەڭ، ءىسىڭ وڭعا باسسىن دەسەڭ اكىمدەردىڭ قۇلاعىڭا سىبىرلاعانىن ايتاسىڭ. ونىڭ ۇسىنە جاڭادان اشىلعان كاسىپتىڭ ءبىر جاعىنا شىعىسىپ، مەملەكەتتىك كۆوتا ءبولىنۋى ءۇشىن دە قۇلاققا سىبىرلانعان ءسوزدى ايتۋ كەرەك بولار. ايتپاقشى ۇمىتىپ بارادى ەكەنمىن، اناۋ قۇلاعان ۇكىمەت بار عوي، كەلمەسكە كەتكەن-سونىڭ داۋرەنىندە سالىنعان اۋرۋحانالار مەن مەكتەپتىڭ ەسكىرگەنىن دە ءبىز سەزبەيمىز عوي. ەسكى مەن جاڭانى اجىراتا المايمىز. ەلباسى جولداۋدا ەسكى نىسانداردى كۇردەلى جوندەۋدەن وتكىزۋ كەرەك دەپ ايتۋى ءتيىس. ءبىز سوندا عانا الگى فرازانى اۋىزعا الا وتىرىپ، جوندەۋ جۇرگىزە باستايمىز. ول راس، كاسىپكەردىڭ بارلىعى ونداي ەمەس. شەتەلدىك يەگەرلەرى بار، الىپ كاسىپورىندار ولاي يلىگىپ جاتپايدى. اقشا اينالىمى جوعارى كومپانيالاردىڭ قۇلاعىنا سىبىرلاۋعا اكىمقارالاردىڭ قاۋقارى جەتە بەرمەسى انىق. قالاي ايتساق تا، كاسىپ اشۋدىڭ كوزىن ەندى ۇيرەنىپ جاتقان قازاققا قازاقتىڭ الىمجەتتىگىن ايقىن بايقاۋعا بولادى. بۇل ەلگە كىمنىڭ تابانى تيمەي جاتىر. بايىماق ماقساتتا اسحاناسىن اشۋعا تۇرىكتەر اعىلدى. مۇنايدى سورۋعا، باعالى ەلەمەنتتەردى وندىرۋگە باتىس پەن شىعىستان انتالاپ كىرىپ جاتىر. كىرە سالا قازاقتىڭ «مارقاسقالارىنىڭ» ماڭدايىنان سيپاپ، قوناقجاي ەكەنسىڭ دەپ قويادى دا، قارنى جۋانداي باستاعاندا مۇرنىن كوككە شۇيىرەدى. سەبەبى كوككە شۇيىرىلگەن مۇرىندى ەندى ەشكىمنىڭ قاناتا الماسىن جاقسى ءتۇسىنىپ الادى. وسىلايشا ءبىزدىڭ ەلدە قوناقتار تالتاڭ باسىپ ءومىر سۇرە الادى. ال كاسىپتىڭ الىپپەسىن اشقان ادام الگى ءسوزدى جاتتاپ الەك بولا تۇرادى. ول فرازا سونشالىقتى جامان ەمەس. ءبىراق ادام ءۇشىن ەڭ قاستەرلى ۇعىمدى قاسيەتسىز ەتىپ ءتۇسىندىرۋدىڭ ءبىر عانا جولى بار. سول قاسيەتتى ۇعىمدى كۇنىنە مىڭ مارتە ايتقىزۋ. باياعىدا جاۋگەرشىلىك زاماندا قولعا تۇسكەن تۇتقىندى اياماي سوققىعا جىعادى ەكەن. سوققاندا دا، تۋعان جەرىنىڭ اتىن ايتقىزىپ تەپكىلەيتىن بولسا كەرەك. ءوزى ءۇشىن ەڭ اياۋلى ۇعىمدى ايتقان سايىن سوققى كورگەن بەيباق، اقىر سوڭىندا الگى سوزدەن جەرىنە باستايدى ەكەن. ال قازاقتى ەلباسىنان جەرىتۋ كىمگە كەرەك بولدى ەكەن؟
اينۇر تولەۋ
