جامبىل وبلىسى قورداي اۋدانىندا بولعان وقيعا سالدارىنان شامامەن 1 ميلليارد 7 ميلليون تەڭگە شىعىن كەلگەن. ساراپشى ماماندار ءۇش كۇن بويى مۇلىكتەردى ساناپ، زەرتتەپ، زەردەلەپ وسىنداي قورىتىندى شىعاردى. ەندى بۇل ماتەريالدىق شىعىن زاڭعا سايكەس شەتىنەن تولەنەدى، دەپ 24.kz حابارلايدى. 

ماماندار تۇرعىنداردى سورتوبە اۋىلى اكىمدىگىنىڭ عيماراتىندا قابىلدايدى. قابىلدايتىن ورىن تاڭعى ساعات 9-دان كەشكى 19:00-گە دەيىن ءۇزىلىسسىز جۇمىس ىستەيدى.

ءقازىر قولدارىندا مۇلىك يەسى ەكەنىن راستايتىن قۇجاتى جوق ادامدار بار. ولاردىڭ ايتۋلارىنشا، كوپشىلىگى قۇجاتتارىن جانجال كەزىندە جوعالتقان. تۇرعىنداردىڭ قۇجاتتارى تالاپقا ساي بولماسا وتەماقى تولىق بەرىلمەيدى.

ءقازىر توتەنشە جاعداي كەزىندە زارداپ شەككەن ازاماتتارمەن جۇمىس جاساۋ ماقساتىندا ارنايى توپتار قۇرىلعان. جۇرتقا ىڭعايلى، ءارى قولجەتىمدى بولۋ ءۇشىن ماسانشى، سورتوبە، بۇلار باتىر ەلدى مەكەندەرىندە جىلجىمالى حالىققا قىزمەت كورسەتۋ ورتالىعى جۇمىس ىستەپ تۇر. ماماندار جۇرتتىڭ ءوتىنىشىن تىركەپ، وسى جەردە قابىلدايدى. بۇگىنگى كۇنگە دەيىن 22 ازاماتقا جەكە كۋالىك، 18 بالاعا تۋۋ تۋرالى كۋالىكتەر بەرىلگەن.